రేపే బన్నీ కొత్త సినిమా లాంఛ్

ప్రస్తుతం అల వైకుంఠపురములో అనే సినిమా చేస్తున్నాడు అల్లు అర్జున్. ఈ సినిమా సెట్స్ పై ఉంటుండగానే మరో సినిమాను ప్రారంభించబోతున్నాడు. అవును.. సుకుమార్ దర్శకత్వంలో బన్నీ చేయాల్సిన సినిమా రేపు ప్రారంభం అవుతోంది. మైత్రీ మూవీ మేకర్స్ ఆఫీస్ లో ఈ సినిమా పూజా కార్యక్రమాలు జరగబోతున్నాయి.

నిజానికి దిల్ రాజు బ్యానర్ లో ఐకాన్, మైత్రీ బ్యానర్ లో సుకుమార్ సినిమాను సైమల్టేనియస్ గా చేయాలనేది బన్నీ ఆలోచన. కానీ ఐకాన్ లో లైన్ నచ్చినప్పటికీ.. బన్నీకి స్క్రీన్ ప్లే నచ్చలేదట. అందుకే ఆ సినిమాను ప్రస్తుతానికి పక్కనపెట్టి, సుకుమార్ సినిమాను సెట్స్ పైకి తీసుకొస్తున్నాడు. మరోవైపు ఇంత హడావుడిగా సినిమాను స్టార్ట్ చేయడానికి కూడా మరో కారణం ఉంది.

శేషాచలం అడవులు, ఎర్రచందనం స్మగ్లింగ్ నేపథ్యంలో సాగే ఈ సినిమాకు సంబంధించి ఓ కీలకమైన ఎపిసోడ్ ను షూట్ చేయడానికి రెడీ అవుతున్నాడు సుకుమార్. ఈ ఎపిసోడ్ షూటింగ్ కు బన్నీ అవసరం లేదు. సో.. సినిమాను లాంఛనంగా ప్రారంభిస్తే ఈలోగా సుకుమార్ ఆ ఎపిసోడ్ షూట్ చూసుకుంటాడు. ఆ తర్వాత నెల రోజులకు బన్నీ సెట్స్ పైకి వస్తాడు. అదన్నమాట సంగతి