సై రా.... రామ్ చరణ్ క్లారిటీ

మెగాస్టార్ చిరంజీవి హీరోగా నటిస్తున్న ‘సైరా నరసింహారెడ్డి’ సినిమాపై భారీ అంచనాలు ఉన్న సంగతి తెలిసిందే. బ్రిటిష్ వారి గుండెల్లో రైళ్లు పరుగెత్తించిన మొట్ట మొదటి స్వాతంత్ర్య సమర యోధుడు ఉయ్యాలవాడ నరసింహారెడ్డి జీవిత చరిత్ర ఆధారంగా తెరకెక్కనున్న ఈ సినిమాకి సురేందర్ రెడ్డి దర్శకత్వం వహిస్తున్నారు.

ఈ మధ్యనే విడుదలైన ఈ చిత్ర టీజర్ ప్రేక్షకుల నుంచి మంచి రెస్పాన్స్ ను అందుకుంది. కొణిదెల ప్రొడక్షన్స్ పతాకంపై రామ్ చరణ్ ఈ సినిమాని స్వయంగా భారీ బడ్జెట్ తో నిర్మిస్తున్నారు.

అయితే గత కొన్ని రోజులుగా ‘సైరా’ సినిమా విడుదల వాయిదా పడిందని వార్తలు వినిపించాయి. తాజాగా సుల్లూరుపేట లోని ప్రభాస్ మల్టీప్లెక్స్ ‘విఐ ఎపిక్’ లాంచ్ సందర్భంగా ముఖ్య అతిథిగా విచ్చేసిన రామ్ చరణ్ ‘సై రా’ సినిమా గురించి కూడా మాట్లాడారు.

ఈ నేపథ్యంలో ఆ వార్తలను కొట్టిపారేసిన చరణ్…. ఈ సినిమా అనుకున్న విధంగానే అక్టోబర్ 2న విడుదల అవుతుందని హామీ ఇచ్చారు. దీంతో మెగా అభిమానులు కూడా ఊపిరిపీల్చుకున్నారు. ఇక ఈ సినిమాలో అమితాబచ్చన్, నయనతార, విజయ్ సేతుపతి, తమన్నా, సుదీప్, వంటి స్టార్ కాస్ట్ ముఖ్య పాత్రలు పోషిస్తున్న సంగతి తెలిసిందే.