నిర్మాతగా మరో సినిమా ప్రకటించిన నాని

నాని నిర్మాతగా మారిన సంగతి పాత విషయమే. వాల్ పోస్టర్ సినిమా అనే బ్యానర్ పెట్టి తొలి ప్రయత్నంగా “అ!” అనే సినిమా తీశాడు. అది కాస్తా కమర్షియల్ గా ఫెయిల్ అవ్వడంతో నిర్మాతగా గ్యాప్ ఇచ్చాడు నాని. “అ!” సినిమా దెబ్బకు నాని ఇక నిర్మాణ రంగం జోలికి వెళ్లడని అంతా అనుకున్నారు. కానీ నాని, నిర్మాతగా తన రెండో సినిమాను ఎనౌన్స్ చేశాడు.

ఫలక్ నుమా దాస్ సినిమా ప్రీ-రిలీజ్ ఫంక్షన్ కు హాజరయ్యాడు నాని. అదే వేదికపై తన రెండో సినిమాను ప్రకటించాడు. ఫలక్ నుమా దాస్ సినిమాలో హీరోగా నటించిన విశ్వక్ సేన్ తో తను నిర్మాతగా సినిమా చేయబోతున్నట్టు ప్రకటించాడు. అయితే అంతకుమించి వివరాల్ని మాత్రం వెల్లడించలేదు నాని.

విశ్వక్ సేన్ కేవలం హీరో మాత్రమే కాదు, ఫలక్ నుమా దాస్ సినిమాతో దర్శకుడిగా కూడా మారాడు. రిలీజ్ కు రెడీ అయిన ఆ సినిమాను ప్రత్యేకంగా చూశాడు నాని. ఆ సినిమా చూసిన తర్వాతే తన బ్యానర్ పై విశ్వక్ సేన్ తో సినిమా చేయాలని నిర్ణయించుకున్నాడు. అయితే ఈ హీరో, విశ్వక్ సేన్ లో హీరోను చూశాడా.. లేక దర్శకుడ్ని చూశాడా అనేది డౌట్. ఫలక్ నుమా దాస్ హిట్ అయితే… అన్ని బాధ్యతల్ని విశ్వక్ సేన్ కే అప్పగిస్తాడేమో!