ఆడదని తెలిసే అంతరిక్షం తీశాం.... వరుణ్‌ షాకింగ్‌ కామెంట్స్‌

చూడ్డానికి కామ్ గా, సైలెంట్ గా కనిపించే వరుణ్ తేజ్.. స్టేట్ మెంట్స్ విషయంలో మాత్రం చాలా క్లియర్ గా ఉంటాడు. ఉన్నది ఉన్నట్టు మాట్లాడ్డానికి అస్సలు వెనకాడడు. సాగర్ చంద్ర దర్శకత్వంలో సినిమా దాదాపు ఉండకపోవచ్చని ఇప్పటికే కుండబద్దలు కొట్టిన ఈ మెగా హీరో, తన రీసెంట్ మూవీ అంతరిక్షంపై కూడా అదే రేంజ్ లో బోల్డ్ గా రియాక్ట్ అయ్యాడు.

అన్ని వర్గాల ప్రేక్షకులకు చేరువవుతుందనే నమ్మకంతోనే అంతరిక్షం సినిమా తీశారా అనే ప్రశ్నకు సూటిగా స్పందించాడు వరుణ్ తేజ్. బి, సి సెంటర్లలో ఈ సినిమా ఆడదు అని మెంటల్లీ ఫిక్స్ అయిన తర్వాతే సెట్స్ పైకి వెళ్లామన్నాడు వరుణ్ తేజ్. ప్రస్తుతం సి-సెంటర్ల నుంచి సినిమాకు ఆశించిన స్థాయిలో వసూళ్లు రావడం లేదనే విషయాన్ని అంగీకరించిన వరుణ్.. ఈ విషయంపై ముందుగానే తాము ప్రిపేర్ అయ్యామని చెప్పుకొచ్చాడు.

అంతరిక్షం కాన్సెప్ట్ అన్ని వర్గాలకు సరిపోయే కథ కాదంటున్నాడు వరుణ్ తేజ్. ఇందులో ఉన్న కొన్ని సాంకేతిక పదాలు, డైలాగ్స్ సి-సెంటర్ ప్రేక్షకులకు అర్థంకావని, సింగిల్ స్క్రీన్స్ లో తమ సినిమా పెద్దగా ఆడదని.. ఈ విషయాలన్నీ ముందే అంచనావేసి మరీ సినిమా తీశామంటున్నాడు.

తెలుగులో వచ్చిన మొట్టమొదటి స్పేస్ సినిమాలో తను హీరోగా నటించాననే క్రెడిట్ తనకు చాలంటున్నాడు. నిర్మాతలు కూడా ఇదే యాంగిల్ లో ఆలోచించి సినిమా తీశారని, ప్రస్తుతం వస్తున్న ఫీడ్ బ్యాక్ పై తామంతా ఫుల్ హ్యాపీగా ఉన్నామంటున్నాడు వరుణ్ తేజ్.