కొత్త సినిమా ఎనౌన్స్ చేసిన విజయ్ దేవరకొండ

నోటా సినిమా ఫ్లాప్ తో ఇక విజయ్ దేవరకొండ స్పీడ్ తగ్గిస్తాడని అంతా అనుకున్నారు. ఆ పుకార్లకు మరింత ఊతమిస్తూ దేవరకొండ కూడా ఇన్నాళ్లూ కొత్త సినిమా ఎనౌన్స్ చేయలేదు. నిత్యం చేతిలో 2 సినిమాలతో బిజీగా ఉండే ఈ హీరో, ఈసారి మాత్రం కేవలం ఒకే ఒక్క సినిమాతో నెట్టుకొస్తున్నాడు. ఎట్టకేలకు ఆ రెండో సినిమాను అఫీషియల్ గా ఎనౌన్స్ చేశాడు విజయ్ దేవరకొండ.

క్రాంతి మాధవ్ దర్శకత్వంలో తన నెక్ట్స్ సినిమా చేయబోతున్నట్టు ప్రకటించాడు ఈ హీరో. ప్రస్తుతం డియర్ కామ్రేడ్ అనే సినిమా చేస్తున్నాడు విజయ్ దేవరకొండ. ఈ సినిమా ఓ కొలిక్కి వచ్చిన వెంటనే క్రాంతి మాధవ్ సినిమా సెట్స్ పైకి వెళ్తుంది. గతంలో క్రాంతిమాధవ్ తీసిన మళ్లీ మళ్లీ ఇది రాని రోజు టైపులోనే సెన్సిబుల్ రొమాంటిక్ ఎంటర్ టైనర్ గా రాబోతోంది ఈ కొత్త సినిమా.

క్రియేటివ్ కమర్షియల్స్ బ్యానర్ పై కేఎస్ రామారావు నిర్మాతగా రాబోతోంది ఈ మూవీ. ఈనెల 18న సినిమాను గ్రాండ్ గా లాంఛ్ చేయబోతున్నారు. సినిమా ఓపెనింగ్ కు ముందే హీరోయిన్ల వివరాల్ని కూడా వెల్లడించారు. రాశిఖన్నా, ఐశ్వర్యరాజేశ్, ఇసా బెల్లాడి ఇందులో హీరోయిన్లుగా నటిస్తారు.