పోస్ట‌ర్లు మారాయి...బిజెపి కార్యాల‌యమూ మార‌బోతోంది!

ఢిల్లీలోని 11 అశోకా రోడ్‌లో ఉన్న బిజెపి కేంద్ర కార్యాల‌యాన్ని మ‌రొక చోటికి త‌ర‌లించ‌నున్నారు. ఇప్పుడున్న ఆఫీస్‌కి ఐదు కిలోమీట‌ర్ల దూరంలో ఉన్న దీన్‌ద‌యాళ్ ఉపాధ్యాయ్ (ఆర్ఎస్ఎస్ నాయ‌కుడు) వీధిలో రెండు ఎక‌రాల విశాల‌ స్థ‌లంలో పార్టీ నూత‌న కార్యాల‌యాన్ని నిర్మించ‌బోతున్నారు. ఎన్నో ద‌శాబ్దా‌ల పాటు బిజెపి ప్ర‌ముఖ నేత‌లు అట‌ల్ బీహారీ వాజ్‌పాయ్‌, అద్వానీలు…పార్టీ కార్య‌క‌లాపాలు నిర్వ‌హించిన పాత కార్యాల‌యంలో ఇప్పుడు వారిద్ద‌రి పోస్ట‌ర్ల‌కు బ‌దులుగా అమిత్‌షా, మోడీ పోస్ట‌ర్లు క‌న‌బ‌డుతున్నాయి. పోస్ట‌ర్ల‌తో పాటు పూర్తిగా పార్టీ కార్యాల‌యాన్నే మార్చే ఉద్దేశంతో ఉంది బిజెపి.

ఈ నెల 18న నూత‌న కార్యాల‌యం నిర్మాణానికి పార్టీ జాతీయాధ్యక్షుడు అమిత్‌షా, ప్ర‌ధాని మోడీ ప్రారంభోత్స‌వం చేయ‌నున్నారు. 2019 జాతీయ ఎన్నిక‌ల‌కు ముందే ఈ కార్యాల‌యం నిర్మాణం పూర్తి చేయాల‌ని భావిస్తున్న‌ట్టుగా పార్టీ వ‌ర్గాలు వెల్ల‌డించాయి. నూత‌న కార్యాల‌యం విశాలంగానూ, దేశంలోని ప్ర‌తి బిజెపి పార్టీ కార్యాల‌యంతోనూ అనుసంధాన‌మై ఉంటుంద‌ని, ఏడంత‌స్తుల ప్ర‌ధాన భ‌వ‌నంతో పాటు, మూడంతస్తుల‌తో మ‌రో రెండు భ‌వ‌నాల‌ను నిర్మించ‌నున్న‌ట్టుగా ఆ వ‌ర్గాలు వెల్ల‌డించాయి.

ప‌ర్యావ‌ర‌ణ‌హితంగానూ, అత్యంత ఆధునిక వ‌స‌తుల‌తోనూ ఈ భ‌వ‌నాల‌ను నిర్మించ‌నున్నార‌ని, వైఫై స‌దుపాయం ఉన్న 70 గ‌దులు, రెండు స‌మావేశ మందిరాలు, డిజిట‌ల్ లైబ్ర‌రీ త‌దిత‌ర స‌దుపాయాలు ఉంటాయ‌ని ఆ వ‌ర్గాలు తెలిపాయి. నేటిత‌రం బిజెపి నాయ‌కులు త‌మ రాజ‌కీయ ప్రాభ‌వానికి గుర్తుగా ఈ కార్యాల‌యాన్ని నిర్మించాల‌నుకుంటున్నార‌ని తెలుస్తోంది.

Click on Image to Read: