భార‌త జిమ్నాస్ట్ దీపా క‌ర్మాక‌ర్ పుట్టినరోజు నేడు...ఒలింపిక్ క్రీడ‌ల గ్రామంలో ఆమె హౌస్ అరెస్టు!

ఒలింపిక్స్ లో ఆర్టిస్టిక్ జిమ్నాస్టిక్స్ లో ఫైన‌ల్‌కి చేరుకుని… భార‌త్ ఆశ‌ల‌కు ఆయువుప‌ట్టుగా నిలిచిన త్రిపుర అమ్మాయి దీపా క‌ర్మాక‌ర్ పుట్టిన‌రోజు నేడు. త‌న సొంత ఊరు అగ‌ర్త‌ల‌కు దాదాపు 35వేల కిలోమీట‌ర్ల దూరంలో ఒలింపిక్ క్రీడ‌ల గ్రామం రియో డి జెనీరో ఉన్న ఆమె… మంగ‌ళ‌వారం 22 నుండి 23వ ఏడులోకి అడుగుపెడుతుంది. కానీ పుట్టిన రోజు సంద‌ర్భంగా ఆమెకు ఎలాంటి వేడుక‌లు లేవు…క‌నీసం స్నేహితుల నుండి శుభాకాంక్షలు కూడా అందే ప‌రిస్థితి లేదు. ఎందుకంటే ఆమె ఫోన్‌లోని సిమ్ కార్డుని తీసేసి ఆమెని హౌస్ అరెస్టు చేశారు ఆమె కోచ్ బిశ్వేశ్వ‌ర్ నంది.

ఆమె త‌ల్లిదండ్రులు శుభాకాంక్ష‌లు తెలిపే అవ‌కాశం మాత్రమే ఇచ్చాను…ఆమె మొబైల్ నుండి సిమ్ కార్డుని తీసేశాను. ఆమె ఏకాగ్ర‌త‌ని భంగం చేయ‌టం నాకిష్టం లేదు…అంటూ గేమ్స్ విలేజ్ నుండి నంది పిటిఐ వార్తా సంస్థ‌తో చెప్పారు. అయితే ఇదంతా దీప ఇష్ట‌ప్ర‌కార‌మే జ‌రుగుతోంద‌ని, ఆమెకు స్నేహితులు చాలా త‌క్కువ‌ని, ఆమె వారికి సైతం దూరంగా…త‌న సాధ‌నపై ఏకాగ్ర‌త‌తో ఉండ‌టానికే ఇష్ట‌ప‌డుతోంద‌ని ఆయ‌న అన్నారు.

నంది.. న్యూఢిల్లోని స్పోర్ట్స్ అథారిటీ ఆఫ్ ఇండియా(సాయ్‌)లో ఆమెకు కోచ్‌గా ఉన్నారు. ఎన్నో ఏళ్ల సాధ‌న‌తో పాటు దీప…‌ మూడునెల‌ల పాటు ఒలింపిక్స్ కోసం క‌ఠోర సాధ‌న చేసిన‌ట్టుగా నంది వెల్ల‌డించారు. జిమ్నాస్టిక్స్‌లో ప్ర‌తి ఈవెంట్ ప్ర‌మాద‌భ‌రిత‌మేన‌ని…యాక్సిడెంట్లు అయ్యే అవ‌కాశాలు ఉంటాయ‌ని…అయితే దీప… ప్ర‌మాదం మ‌రింత ఎక్కువ‌గా ఉండే ప్రొడునోవాలో అత్యంత నైపుణ్యం సాధించింద‌ని ఆయ‌న అన్నారు.

అగ‌ర్త‌ల‌లోని ఓ వెయిట్‌లిఫ్టింగ్ కోచ్ కుమార్తె దీప‌. ఆమెకు ఒక అక్క ఉంది. దీప మూడేళ్ల వ‌య‌సు నుండి జిమ్నాస్టిక్స్ సాధ‌న మొద‌లుపెట్టింది. ఆమెకు మొద‌టి కోచ్ నంది భార్య సుమ‌…అప్పుడు ఆమె సాయ్ కోచ్‌గా ఉన్నారు. సుమే దీప‌ని త‌న భ‌ర్త‌కు ప‌రిచ‌యం చేసింది. అప్ప‌టినుండి నంది, దీప‌కు కోచ్‌గా మారారు. ఇక వెన‌క్కితిరిగి చూడ‌లేదు…అంటున్నారాయ‌న‌. దీప ఆగ‌స్టు 14న జ‌ర‌గ‌నున్న‌ ఫైన‌ల్‌లో మ‌న‌ల్ని నిరాశ‌ప‌ర‌చ‌దు…అంటున్నారు నంది. దీప ఫైన‌ల్ ప్ర‌ద‌ర్శ‌న ముగించే స‌మ‌యానికి భార‌త‌ కాల‌మానం ప్రకారం ఆగ‌స్టు 15 వ‌చ్చేస్తుంద‌ని….దేశానికి స్వాతంత్ర్య దినోత్స‌వం రోజున అత్య‌ద్భుత‌మైన బ‌హుమ‌తిని దీప అందిస్తుంద‌ని…త‌రువాతే ఆమె త‌న పుట్టిన రోజు వేడుక‌ల‌ను జ‌రుపుకుంటుంద‌ని….నంది అన్నారు.

Click on Image to Read: