అబార్ష‌న్ హ‌క్కుల‌పై సుప్రీం కోర్టులో నేడు విచార‌ణ‌!

దేశంలోని అబార్ష‌న్ చ‌ట్టాలను ప్ర‌శ్నిస్తూ దాఖ‌లైన పిటీష‌న్‌పై సుప్రీంకోర్టు నేడు విచార‌ణ జ‌ర‌ప‌నుంది. గ‌ర్భం ధ‌రించి 20వారాలు దాటితే అబార్ష‌న్‌కి అనుమ‌తించ‌ని నేటి చ‌ట్టాల్లో మార్పు రావాల‌ని కోరుతూ దాఖ‌లైన పిటీష‌న్‌పై విచార‌ణ జ‌రిపేందుకు అంగీక‌రిస్తున్న‌ట్టుగా కోర్టు బుధ‌వారం ప్ర‌క‌టించింది. గురువారం దీనిపై విచార‌ణ జ‌రుపుతామ‌ని పేర్కొంది. అసాధార‌ణ వైద్య స‌మ‌స్య‌లు ఉన్న‌పుడు, పిండం ప‌రిస్థితి స‌రిగ్గా లేన‌పుడు అబార్ష‌న్‌కి అవ‌కాశం ఇవ్వ‌కుండా ఈ చ‌ట్టాలు అడ్డుప‌డుతున్నాయ‌ని ఓ గ‌ర్భ‌వ‌తి పిటీష‌న్ దాఖ‌లు చేశారు. పిండం వైద్య‌ప‌ర‌మైన లోపాల‌తో ఉన్న‌పుడు గ‌ర్భిణుల మాన‌సిక వేద‌న‌కు అంతు ఉండ‌ద‌ని, అలాంట‌పుడు అబార్ష‌న్ త‌ప్ప‌నిస‌రి అయితే అబార్ష‌న్ చ‌ట్టాలు అడ్డుపడుతున్నాయ‌ని ఆమె పిటీష‌న్‌లో పేర్కొన్నారు.

20 వారాల త‌రువాత అబార్ష‌న్‌కు ప్ర‌స్తుత చ‌ట్టాలు అనుమ‌తించ‌క‌పోవ‌టంపై ఆమె ప్ర‌శ్నించారు. ఈ ప‌రిమితి స‌హేతుకం కాద‌ని, జీవించే హ‌క్కు, స‌మాన‌త్వ హ‌క్కుల‌కు విరుద్ధ‌మ‌ని, ఈ చ‌ట్టాన్ని రాజ్యాంగ విరుద్ధంగా ప్ర‌క‌టించాల‌ని పిటీష‌న‌ర్ కోరారు. ప్ర‌స్తుత‌మున్న మెడిక‌ల్ టెక్నాల‌జీ 26వ‌వారం వ‌ర‌కు సుర‌క్షితంగా అబార్ష‌న్ చేసేందుకు వీలు క‌ల్పిస్తుండ‌గా 20 వారాల ప‌రిమితిని పెంచాల్సిన అవ‌స‌ర‌ముంద‌న్నారు. 24 వారాల గ‌ర్భ‌వ‌తి అయిన పిటిష‌న్ దారు, నేటి అధునాత‌న వైద్య సదుపాయాల‌ను దృష్టిలో ఉంచుకుని 1971నాటి అబార్ష‌న్ చ‌ట్టంలో మార్పులు చేయాల్సి ఉంద‌న్నారు.

అవాంఛిత గ‌ర్భాన్ని, లైంగిక వైధింపుల కార‌ణంగా వ‌చ్చిన గ‌ర్భాన్ని మోయ‌టం… గౌర‌వంగా జీవించే హ‌క్కుని, లైంగిక‌, పున‌రుత్ప‌త్తి విష‌యంలో రాజ్యాంగం ఇచ్చిన స్వేచ్ఛ‌ని కోల్పోవ‌డ‌మేన‌ని ఆమె పేర్కొన్నారు. అయితే అబార్ష‌న్ అవ‌కాశాన్ని క‌లిగించే కాల‌ప‌రిమితి పెరుగుతున్న కొద్దీ అది మ‌హిళ‌ల ఆరోగ్యానికి, ప్రాణాల‌కు ప్రమాదాన్ని తెచ్చి పెట్టే అవ‌కాశం ఉంటుంద‌ని, ఆ విష‌యాన్ని మ‌ర్చిపోకూడ‌ద‌ని న్యాయ‌నిపుణులు అభిప్రాయ‌ప‌డుతున్నారు. రెండువైపులా ప‌దునున్న క‌త్తిలాంటి ఇలాంటి చ‌ట్టాల విష‌యంలో ఎలాంటి మార్పులు తెచ్చినా అవి మంచి చెడూ రెండింటికీ దారితీయ‌క త‌ప్ప‌దు. ప‌రిస్థితులు, వ్య‌క్తులను బ‌ట్టి ఇలాంటి చ‌ట్టాలు స‌ద్వినియోగం కావ‌చ్చు…దుర్వినియోగ‌మూ అయ్యే ప్రమాదం ఉంది. అందుకే చాలా దేశాల్లో అబార్ష‌న్ చ‌ట్టాల విష‌యంలో ఎప్ప‌టిక‌ప్పుడు వివాదాలు చెల‌రేగుతూనే ఉన్నాయి.