అమెరికాగడ్డపై 2024- టీ-20 ప్రపంచకప్ కు కౌంట్ డౌన్!

2024-ఐసీసీ టీ-20 ప్రపంచకప్ కు అమెరికా, కరీబియన్ ద్వీపాల గడ్డపై కౌంట్ డౌన్ ప్రారంభమయ్యింది. ఈ నెల 29 వరకూ జరిగే 55 మ్యాచ్ ల ఈ మహాసమరంలో భారత్ తో సహా 20 దేశాలజట్లు ఢీ కొనబోతున్నాయి.

క్రికెట్ ను విశ్వవ్యాప్తం చేయడంలో ఐసీసీ ( అంతర్జాతీయ క్రికెట్ మండలి) దాదాపుగా సఫలమయ్యింది. ప్రపంచంలోనే అతిపెద్ద క్రీడామార్కెట్ గా ఉన్న అమెరికాలో తొలిసారిగా క్రికెట్ ను జొప్పించగలిగింది.

2024-ఐసీసీ టీ-20 ప్రపంచకప్ సంగ్రామానికి వెస్టిండీస్ క్రికెట్ బోర్డుతో కలసి అమెరికా క్రికెట్ సంఘం ఆతిథ్యమిస్తోంది. టీ-20 ప్రపంచకప్ చరిత్రలోనే తొలిసారిగా అమెరికాజట్టు బరిలోకి దిగుతోంది.

టెక్సాస్ వేదికగా ప్రారంభమ్యాచ్....

మొత్తం 20 జట్లు, నాలుగు గ్రూపుల ఈ లీగ్ కమ్ నాకౌట్ టోర్నీలో భాగంగా 15 మ్యాచ్ లను అమెరికాలోని న్యూయార్క్, డాలస్ వేదికలుగా నిర్వహించడానికి అమెరికా క్రికెట్ సంఘం ఏర్పాట్లు చేసింది.

టెక్సాస్ వేదికగా జరిగే టోర్నీతొలిపోరులో అమెరికాతో కెనడా తలపడనుంది. భారత్, పాకిస్థాన్, ఐర్లాండ్, కెనడాజట్లతో కూడిన గ్రూప్ -ఏ లీగ్ లో సంయుక్త ఆతిథ్య అమెరికా పోటీపడుతోంది.

గయానా వేదికగా ప్రారంభ వేడుకలు...

ప్రపంచకప్ ప్రారంభ వేడుకలను మాత్రం గయానాలోని ప్రావిడెన్స్ స్టేడియం వేదికగా జూన్ 2న వెస్టిండీస్ క్రికెట్ బోర్డు నిర్వహించనుంది. పసికూన పాపువా- న్యూగినియా, రెండుసార్లు విజేత వెస్టిండీస్ జట్ల నడుమ జరిగే గ్రూప్ ప్రారంభమ్యాచ్ కు ముందు ప్రారంభ వేడుకలను అట్టహాసంగా నిర్వహించనున్నారు.

కరీబియన్ ద్వీపదేశాలలోని ప్రముఖ గాయకులు, డీజెలు డేవిడ్ రుడ్డర్, రవి బి, ఇర్ఫాన్ అల్వేస్, డిజె అనా, అల్ట్ర్రాలు ప్రారంభవేడుకల్లో ప్రత్యేక ఆకర్షణగా నిలువనున్నారు.

ప్రపంచకప్ ప్రారంభవేడుకలతో పాటు..మొత్తం 55 మ్యాచ్ ల ప్రత్యక్షప్రసారం కోసం స్టార్ స్పోర్ట్స్ నెట్ వర్క్, హాట్ స్టార్ విస్త్ర్రుత స్థాయిలో ఏర్పాట్లు చేశాయి.

ప్రపంచకప్ ప్రచారకర్తగా ఉసెన్ బోల్ట్...

ప్రస్తుత టీ-20 ప్రపంచకప్ కు మానవచిరుత, జమైకన్ స్ప్ర్రింట్ గ్రేట్ ఉసెన్ బోల్ట్ ప్రచారకర్తగా వ్యవహరిస్తున్నాడు.

తనకు ఎంతో ఇష్టమైన క్రికెట్ ఆటకు ప్రచారకర్త కావడం గర్వకారణమని, ప్రపంచకప్ కు తనను ఐసీసీ బ్రాండ్ అంబాసిడర్ గా నియమించడం తన అదృష్టమని బోల్ట్ చెప్పాడు.

కరీబియన్ ద్వీప దేశాల ప్రజల దైనందినజీవితంలో క్రికెట్ ఓ ప్రధానభాగమని, ఏ ద్వీపానికి వెళ్లినా క్రికెట్ ఆడుతూనే కనిపిస్తారని, తన గుండెల్లో క్రికెట్ కు ప్రత్యేక స్థానముందని బోల్ట్ ప్రకటించాడు.

ప్రపంచ వ్యాప్తంగా కోట్లాదిమంది అభిమానులున్న ఉసెన్ బోల్ట్ ప్రపంచకప్ ప్రచారకర్త బాధ్యతలు చేపట్టడం తమకు ఎనలేని సంతోషాన్ని కలిగించిందని, పరుగుతో పాటు క్రికెట్ కూడా బోల్ట్ కు ఇష్టమని ఐసీసీ ప్రధానకార్యనిర్వహణాధికారి జెఫ్ అలార్ డెస్ ప్రకటించారు.

అమెరికాలాంటి దేశం వేదికగా ప్రపంచకప్ క్రికెట్ మ్యాచ్ లు నిర్వహించడం గొప్ప విషయమని, క్రికెట్ కు ఇది ఎంతో మేలు చేస్తుందని చెప్పాడు. 2028 లాస్ ఏంజలిస్ ఒలింపిక్స్ లో క్రికెట్ ను పతకం అంశంగా ప్రవేశపెట్టడం కూడా గొప్ప పరిణామమని చెప్పాడు.

2024 టీ-20 ప్రపంచకప్ ప్రత్యేక ప్రచార గీతాన్ని విఖ్యాత గాయకులు సీన్ పాల్, కెస్ లతో కలసి బోల్ట్ కొద్దిరోజుల క్రితమే ఆవిష్కరించాడు.

అమెరికాగడ్డపై ప్రపంచకప్ ను ఊహించలేదు...

అమెరికాగడ్డపై టీ-20 ప్రపంచకప్ ను ఆడటం తనకు ఓ కలలా ఉందని భారత బ్యాటింగ్ గ్రేట్ విరాట్ కొహ్లీ చెప్పాడు. ప్రపంచకప్ లో పాల్గొనటానికి న్యూయార్క్ చేరుకొన్న విరాట్..తన మనసులోని మాటను బయటపెట్టాడు. ప్రపంచకప్ కు అమెరికా ఆతిథ్యమివ్వడం తనకు ఆశ్చర్యంగా అనిపిస్తోందని చెప్పాడు.

భారతజట్టు తన ప్రారంభ గ్రూప్ లీగ్ మ్యాచ్ లో ఈనెల 5న ఐర్లాండ్ తో తలపడనుంది. న్యూయార్క్ వేదికగా ఈనెల 9న జరిగే కీలకపోరులో చిరకాల ప్రత్యర్థి పాకిస్థాన్ తో భారత్ అమీతుమీ తేల్చుకోనుంది.

ఇవీ టీ-20 ప్రపంచకప్ వేదికలు...

టీ-20 ప్రపంచకప్ గ్రూపులీగ్ కమ్ నాకౌట్ రౌండ్ మ్యాచ్ లను కరీబియన్ ద్వీపాలలోని ఆరు ( బార్బడోస్ లోని కెన్సింగ్టన్ ఓవల్, ట్రినిడాడ్ లోని బ్రియాన్ లారా అకాడమీ స్టేడియం, గయానాలోని ప్రావిడెన్స్ స్టేడియం, ఆంటీగా లోని సర్ వివియన్ రిచర్డ్స్ స్టేడియం, సెయింట్ లూకాలోని డారెన్ సామీ క్రికెట్ గ్రౌండ్, సెయింట్ విన్సెంట్ లోని ఆర్నోస్ వాలే స్టేడియం ) వేదికలుగాను, అమెరికాలోని మూడు ( న్యూయార్క్ లోని ఐసెన్ హోవర్ పార్క్, ఫ్లారిడాలోని లాడెర్ హిల్, , టెక్సస్ లోని గ్రాండ్ ప్రయరీ) వేదికల్లోనూ 55 మ్యాచ్ ల గ్రూప్ లీగ్ కమ్ నాకౌట్ ప్రపంచకప్ మ్యాచ్ లు నిర్వహించనున్నారు.

జూన్ 1 నుంచి 18 వరకూ గ్రూప్ లీగ్ పోటీలు..

జూన్ 1 నుంచి 18 వరకూ గ్రూపు దశ పోటీలు జరుగుతాయి. జూన్ 19 నుంచి 24 వరకూ సూపర్ - 8, జూన్ 26, 27 తేదీలలో సెమీఫైనల్స్, జూన్ 29న ఫైనల్స్ నిర్వహిస్తారు.

గ్రూప్- ఏ లీగ్ లో హాట్ ఫేవరెట్ భారత్, మాజీ చాంపియన్ పాకిస్థాన్ జట్లతో ఐర్లాండ్, కెనడా, అమెరికా జట్లు తలపడతాయి.

గ్రూపు- బీ లీగ్ లో ఇంగ్లండ్, ఆస్ట్ర్రేలియా, నమీబియా, స్కాట్లాండ్, ఒమన్ జట్లు పోటీపడతాయి. గ్రూప్- సీ లీగ్ లో న్యూజిలాండ్, అప్ఘనిస్థాన్, ఉగాండా, పాపువా న్యూగినియా, గ్రూప్- డీ లో దక్షిణాఫ్రికా, శ్రీలంక, బంగ్లాదేశ్, నెదర్లాండ్స్, నేపాల్ ఢీ కొంటాయి.