టీటీడీ కల్తీ నెయ్యి కేసు.. నిందితులకు ముగిసిన సిట్ విచారణ

శ్రీవారి లడ్డూ తయారీలో కల్తీ నెయ్యి వినియోగానికి సంబంధించిన కేసులో నలుగురు నిందితుల విచారణకు కోర్టు విధించిన కస్టడీ గడువు ముగిసింది. సిట్‌ తాత్కాలిక కార్యాలయంలో విచారణ అనంతరం నిందితులను రుయా ఆసుపత్రికి తరలించి వైద్య పరీక్షలు నిర్వహించారు. ఆ తర్వాత తిరుపతి రెండవ అదనపు మేజిస్ట్రేట్‍ కోర్టు న్యాయమూర్తి ఎదుట హాజరుపర్చారు.

ఉత్తరాఖండ్‌కు చెందిన బోలేబాబా డెయిరీ మాజీ డైరెక్టర్లు పోమిల్ జైన్, విపిన్ జైన్, వైష్ణవి డెయిరీ సీఈఓ అపూర్వ వినయకాంత్ చావడా, తమిళనాడులోని ఏఆర్‍ డైయిరీ ఎండీ రాజశేఖరన్‌ను 5 రోజులుగా నెయ్యి కల్తీ ఘటనకు సంబంధించి సిట్‌ అధికారులు విచారించారు. నిందితులు విచారణకు సహకరించలేదని, మరి కొన్ని రోజులు కస్టడీ పొడిగించాలని సిట్ కోరినట్లు తెలుస్తోంది. సోమవారం జరగాల్సిన నిందితుల బెయిల్ పిటిషన్‌పై విచారణ బుధవారం జరగనుంది.