తెలంగాణ దశాబ్ది వేడుకలకు సోనియా దూరం.. కారణం ఏంటంటే?

తెలంగాణ రాష్ట్ర అవతరణ దశాబ్ధి వేడుకలకు కాంగ్రెస్ సీనియర్ నేత సోనియా గాంధీ హాజరుకావట్లేదని సమాచారం. రేపటి తెలంగాణ పర్యటనను సోనియా గాంధీ రద్దు చేసుకున్నట్లు పార్టీ వర్గాలు తెలిపాయి. అనారోగ్యం, ప్రస్తుతం ఉన్న ఎండల కారణంగా సోనియా రాలేకపోతున్నట్లు తెలిపాయి.

సోనియా గాంధీ దశాబ్ధి వేడుకలకు హాజరుకాలేకపోయినప్పటికీ.. వీడియో ద్వారా తన సందేశం వినిపిస్తారని కాంగ్రెస్ పార్టీ వర్గాలు తెలిపాయి. తెలంగాణ రాష్ట్ర ఆవిర్భావ వేడుకల కోసం ప్రభుత్వం ఘనంగా ఏర్పాట్లు చేస్తున్న విషయం తెలిసిందే.

స్వయంగా ఢిల్లీకి వెళ్లిన సీఎం రేవంత్ రెడ్డి.. దశాబ్ది వేడుకలకు సోనియాగాంధీని ఆహ్వానించారు. అయితే సోనియా సానుకూలంగా స్పందించారని చెప్పారు. సోనియా చేతుల మీదుగా అందెశ్రీ రచించిన రాష్ట్ర గీతం ఆవిష్కరించాలని రేవంత్ సహా కాంగ్రెస్ నేతలు భావించారు. కానీ అనారోగ్యం, ప్రస్తుతం దాదాపు 48-49 డిగ్రీల పైగా ఉష్ణోగ్రతలు నమోదవుతుండడంతో పర్యటనను రద్దు చేసుకున్నట్లు సమాచారం.