ఏపీలోని మూడు కీలక ఎయిర్‌పోర్టులు ప్రైవేట్‌పరం!

దేశంలోని పోర్టులు, ఎయిర్‌పోర్టులు, ఫ్యాక్టరీలు ఇలా వరుస పెట్టి ప్రైవేట్‌కు అప్పగిస్తున్న మోడీ సర్కార్ ఇప్పుడు ఏపీలోని మరో మూడు కీలకమైన ఎయిర్‌పోర్టులను కూడా ప్రైవేటీకరణ దారి పట్టిస్తోంది. తిరుపతి, విజయవాడ, రాజమండ్రి ఎయిర్‌పోర్టులను ప్రైవేటీకరించేందుకు సిద్ధమైంది. ఈ విషయాన్ని కేంద్ర పౌర విమానయాన శాఖ సహాయ మంత్రి వీకే సింగ్‌ రాజ్యసభలో వెల్లడించారు.

దేశంలోని ఎయిర్‌పోర్టుల ప్రైవేటీకరణపై కేరళ సీపీఎం సభ్యుడు కరీం అడిగిన ప్రశ్నకు సమాధానంగా.. దేశంలోని 25 ఎయిర్‌పోర్టులను ప్రైవేటీకరించేందుకు నిర్ణయించినట్టు కేంద్ర‌మంత్రి తెలిపారు. 2022-25 మధ్యలో ఈ పని పూర్తి చేస్తామన్నారు. ప్రైవేటీకరణ జాబితాలోని 25 ఎయిర్‌పోర్టుల్లో తిరుపతి, రాజమండ్రి, విజయవాడ ఎయిర్‌పోర్టులు కూడా ఉన్నాయి. నేషనల్ మానిటైజేషన్ పైప్‌లైన్ స్కీం కింద వీటిని ప్రైవేటీకరణ జాబితాలో చేర్చారు.