30 విమానాలను ప్రవేశపెట్టనున్న ఎయిర్ ఇండియా

దేశంలోని విమాన ప్ర‌యాణికుల‌కు రానున్న రోజుల్లో ప్ర‌యాణం మ‌రింత సౌల‌భ్యంగా మారనుంది. ఎందుకంటే రానున్న15 నెల‌ల్లో ఎయిర్ ఇండియా 30 విమానాల‌ను అద‌నంగా ప్ర‌వేశ‌పెట్ట‌నుంది. దీంతో విమాన టిక్కెట్ల బుకింగ్‌లో ర‌ద్దీ కొంత‌మేర‌కు త‌గ్గ‌నుంది. సోమ‌వారం ఈ విష‌యాన్ని ఎయిర్ ఇండియా వెల్ల‌డించింది. ఈ ఏడాది డిసెంబ‌ర్ నుంచి 30 కొత్త విమానాల‌ను క్ర‌మంగా ప్ర‌వేశ‌పెడ‌తామ‌ని పేర్కొంది. వాటిలో ఐదు వైడ్ బాడీ బోయింగ్ విమానాలు ఉంటాయ‌ని వివ‌రించింది.

టాటాస్ యాజమాన్యంలోని ఎయిర్‌లైన్ తన దేశీయ, అంతర్జాతీయ సేవలను పెంచడానికి చూస్తుండ‌టంతో ఎయిర్ ఇండియా ఈ మేర‌కు ఈ ప్ర‌క‌ట‌న చేసింది. రాబోయే 15 నెలల్లో 5 వైడ్-బాడీ బోయింగ్, 25 ఎయిర్‌బస్ నారో బాడీ విమానాలను ప్రవేశపెట్టడానికి ఎయిర్‌లైన్ లీజులు, లెటర్ ఆఫ్ ఇండెంట్‌లపై సంతకం చేసింది. ఇదిలా ఉండ‌గా.. 2040 నాటికి భారతదేశంలోని విమానయాన సంస్థలకు 2,210 విమానాలు అవసరమవుతాయని ఎయిర్‌బస్ ఇటీవ‌ల‌ అంచనా వేయ‌డం గ‌మ‌నార్హం.