జీవన్‌రెడ్డి అనుచరుడు గంగారెడ్డి హత్యకేసులో నిందితుడి అరెస్ట్
రిమాండ్‌కు తరలించినట్లు తెలిపిన జిల్లా ఎస్పీ అశోక్‌కుమార్‌
జగిత్యాలలో ఎమ్మెల్సీ జీవన్‌రెడ్డి ముఖ్య అనుచరుడు మారు గంగారెడ్డి హత్య కేసులో నిందితుడు బత్తిని సంతోష్‌ను పోలీసులు అరెస్ట్ చేసి రిమాండ్‌కు తరలించినట్లు జిల్లా ఎస్పీ అశోక్‌కుమార్‌ తెలిపారు. జగిత్యాల గ్రామీణ మండలం జాబతాపూర్‌లో ఈ నెల 22న ఉదయం 8 గంటల ప్రాంతంలో బైక్‌పై ఇంటికి వెళ్తున్న గంగారెడ్డిని అదే గ్రామానికి చెందిన బత్తిని సంతోష్‌ కారుతో ఢీకొట్టి, కత్తితో దారుణంగా పొడిచి హత్య చేశాడు. ఈ కేసు జగిత్యాలలో సంచలనం సృష్టించగా.. రాష్ట్ర రాజకీయాల్లో ప్రకంపనలు సృష్టించింది. హత్యకు నిరసనగా ఎమ్మెల్సీ జీవన్‌రెడ్డి సుమారు 3 గంటల పాటు జగిత్యాల పాత బస్టాండ్‌ వద్ద ధర్నా నిర్వహించారు. ఈ సందర్భంగానే జీవన్‌రెడ్డి శాంతిభద్రతలపై, రాష్ట్రంలో కాంగ్రెస్‌ ప్రభుత్వం ఉన్నప్పటికీ కాంగ్రెస్‌ నేతలకే రక్షణ లేదని వాపోయారు. రాజకీయ హత్యలపై, ఫిరాయింపు రాజకీయాలపై ఆయన ఘాటు వ్యాఖ్యలు చేశారు. నిందితుడి వెనుక పెద్దవాళ్లు ఉన్నారని ఆరోపించారు. ఈ నేపథ్యంలోనే నిందితుడిని పోలీసులు అరెస్టు చేసి రిమాండ్‌కు తరలించారు.