Game Changer | చరణ్ సినిమా నుంచి ఆగని లీకులు

రామ్ చరణ్ తో పాటు అతడి ఫ్యాన్స్ ఎంతో ఆసక్తిగా ఎదురుచూస్తున్న సినిమా గేమ్ ఛేంజర్. అయితే మెగా అభిమానులను నిరాశపరిచే విధంగా ఈ సినిమా ఎప్పటికప్పుడు ఆలస్యమౌతూనే ఉంది. చాలా కాలం క్రితం టైటిల్ రివీల్ చేశారు. ఫస్ట్ సింగిల్ 'జరగండి' వచ్చింది. ఈ రెండు మినహా పెద్దగా ఏమీ వెల్లడించలేదు. దీనికి తోడు మొదటి పాటకు తమన్ అందించిన సంగీతం, దానికి ప్రభుదేవా అందించిన కొరియోగ్రఫీని నెటిజన్లు విమర్శించడంతో పెద్దగా ఆదరణ దక్కలేదు.

ఈ ఆలస్యానికి, విమర్శలకు తోడు.. ఇప్పుడు లీకులు అదనం. సెట్స్ నుండి ఎప్పటికప్పుడు లీక్ అవుతున్న ఫొటోలు, వీడియోల్ని అరికట్టడం మేకర్స్‌కు మరో పెద్ద సవాలుగా మారింది. మొదటి నుంచి షూటింగ్ సన్నివేశాలు లీక్ అవుతూనే ఉన్నాయి. మొదటి సింగిల్ 'జరగండి' కూడా రామ్ చరణ్ లుక్‌ని అధికారికంగా విడుదల చేయడానికి ముందే లీక్ చేశారు కొంతమంది. ఇక ఇటీవలి కాలంలో అనేక ఆన్-లొకేషన్ వీడియోలు కూడా ఆన్‌లైన్‌లో కనిపించాయి.

ఇప్పుడు, ఒక పాట బిట్, ఎయిర్ పోర్ట్ సన్నివేశం లీక్ అయ్యాయి. ఆ వెంటనే ట్రెండింగ్ అయ్యాయి కూడా. గేమ్ ఛేంజర్ షూట్‌లో ఎక్కువ భాగం అవుట్‌డోర్ షెడ్యూల్‌. అందుకే లీక్స్ ఆపలేకపోతున్నారు. ఇప్పుడీ లీకులు సినిమాపై ఆసక్తిని తగ్గించేలా ఉన్నాయి.

దీనికితోడు భారతీయుడు-2తో డిజాస్టర్ ఇచ్చాడు శంకర్. ఓవైపు లీకులు, ఇంకోవైపు డిజాస్టర్.. దీంతో గేమ్ ఛేంజర్ పరిస్థితి అయోమయంలో పడింది. ఈ సినిమా విడుదల తేదీని ప్రకటించడానికి సిద్ధమైంది యూనిట్. ఎప్పుడైతే భారతీయుడు-2 ఫ్లాప్ అయిందో ఆ ప్రకటనను విరమించుకుంది.