అన్నీ మీ కులపోళ్లకేనా..?

టీడీపీ ఆధికారంలోకి వచ్చాక, అన్ని కీలక పోస్టింగ్ లు కమ్మవాళ్లకే కట్టబెడుతున్నారంటూ మండిపడ్డారు వైసీపీ ఎంపీ విజయసాయి రెడ్డి. చివరకు టీటీడీ అడిషనల్ ఈవో పోస్ట్ కూడా కమ్మవారికే ఇచ్చారని గుర్తు చేశారు. టీటీడీ చైర్మన్ పదవి కూడా కమ్మవారికే ఇవ్వబోతున్నట్టు సమాచారం ఉందన్నారు. ఢిల్లీలో ఏపీ ప్రతినిధిగా కూడా అదే సామాజిక వర్గానికి చెందిన వారికి అవకాశం ఇచ్చారని, ఇదెక్కడి న్యాయం అని ట్విట్టర్లో నిలదీశారు. ఆయా పోస్ట్ లకు కమ్మవారు మినహా మిగతా ఎవరూ పనికిరారు అని చంద్రబాబు అనుకుంటున్నారా అని ప్రశ్నించారు విజయసాయి రెడ్డి.

చంద్రబాబు అధికారంలో ఉంటే ఒకమాట, ప్రతిపక్షంలో ఉంటే మరో మాట మాట్లాడతారని ఆయనవి డబుల్ స్టాండర్స్డ్ అని ఎద్దేవా చేశారు విజయసాయి రెడ్డి. ప్రతిపక్షంలో ఉన్నప్పుడు లెక్కకు మిక్కిలి హామీలు ఇస్తారని, అధికారంలోకి వచ్చాక మాత్రం వాటన్నిటినీ అటకెక్కిస్తారని, కేవలం తన కుటుంబం, తన కులపోళ్లకోసం మాత్రమే ఆయన ఆలోచిస్తారని చెప్పారు. బాబు పాలనలో సమగ్రతకు చోటేది అని ప్రశ్నించారు విజయసాయిరెడ్డి.

విజయసాయి రెడ్డి ట్వీట్లు సోషల్ మీడియాలో వైరల్ మారాయి. గతంలో ఏం జరిగింది, ఇప్పుడు ఏం జరిగింది అనే లెక్కలు తీస్తున్నారు నెటిజన్లు. అమరావతికోసం చంద్రబాబు తాపత్రయ పడింది కూడా ఆ సామాజిక వర్గం కోసమేనని విమర్శిస్తున్నారు కొందరు.