కోటీశ్వ‌రురాలు...రోడ్డుప‌క్క టిఫిన్ బండి న‌డుపుతున్నారు!

ఆమెకు మూడుకోట్ల రూపాయిల విలువ చేసే ఇల్లుంది. రెండు కార్లు మ‌హింద్రా స్కార్పియో, హ్యుండాయ్ క్రెటా ఉన్నాయి. ఆమె చ‌క్క‌ని ఇంగ్లీషు మాట్లాడ‌గ‌ల‌రు. రోజంతా ఏసిలో ఉండే జీవితం ఆమెది…ఇప్పుడు అదే మ‌హిళ ….రోడ్డు ప‌క్క టిఫిన్ బండి న‌డుపుతున్నారు. అయ్యో… ఆస్తి అంతా పోయిందేమో అనుకుంటున్నారా…కాదు…ఆస్తిని అలాగే కాపాడుకునేందుకు, ఆర్థికంగా చితికిపోకుండా ఉండేందుకే …ఆమె ఈ వ్యాపారం చేస్తున్నారు. ఆమె పేరు ఊర్వశి…ఆమె గురించి….

మ‌న‌కు డిగ్నిటీ ఆఫ్ లేబ‌ర్ అనే ప‌దం ఉంది కానీ….దాన్ని పాటించాలంటే కాస్త కష్ట‌మే. కానీ ఊర్వ‌శిని చూసిన‌పుడు ఆమె అక్ష‌రాలా శ్ర‌మ‌ని ఎంత‌గా గౌర‌విస్తున్నారో అర్థ‌మ‌వుతుంది. హ‌ర్యానాలోని గుర్‌గావ్ లో సెక్డార్ 14 రోడ్డుమీద టిఫిన్ బండి న‌డుపుతున్నారామె. అక్క‌డి ఫేమ‌స్ ఫుడ్ ఛోలే కుల్చే… ఆ బండిలో దొరుకుతుంది. ఈ వ్యాపారం మీద ఊర్వ‌శి రోజుకి మూడువేల రూపాయ‌లు సంపాదిస్తారు. ఆమె ఈ వ్యాపారం మొద‌లుపెట్టి 45 రోజులే అవుతున్నా…ఆ ప్రాంతంలో చాలా పేరు సంపాదించారు. అందుకు కార‌ణం ఆమె అమ్ముతున్న ఫుడ్ రుచే కాదు…ఆమె నేప‌థ్యం కూడా.

ఊర్వ‌శికి మూడుకోట్ల రూపాయ‌ల విలువ చేసే ఇల్లు ఉంది. రెండు కార్లున్నాయి. ఆమె గ‌త జీవితంలోకి వెళితే… ఊర్వ‌శి ఈ వ్యాపారం ఎందుకు చేస్తున్నారో అర్థ‌మ‌వుతుంది.

ఊర్వ‌శి భ‌ర్త అమిత్ యాద‌వ్ (37) ఒక ప్ర‌ముఖ క‌న్‌స్ట్ర‌క్ష‌న్ కంపెనీలో ఎగ్జిక్యూటివ్‌గా ప‌నిచేస్తుండేవారు. ఊర్వ‌శి మామ‌గారు భార‌త వైమానిక ద‌ళంలో వింగ్ క‌మాండ‌ర్‌గా ప‌నిచేసి రిటైర్ అయ్యారు. ఈ ఏడాది మే 31న అమిత్ త‌న ఇంట్లోనే ప‌డిపోయాడు. అత‌నికి అంత‌కుముందు 2010లో క్రికెట్ ఆడుతుండ‌గా కుడికాలు విరిగింది. అప్పుడు ఒకసారి ఆప‌రేష‌న్ అయ్యి… రెండునెల‌ల త‌రువాత కోలుకున్నాడు. ఇప్ప‌టి దెబ్బ‌తో…. డాక్ట‌ర్లు డిసెంబ‌రులో అత‌నికి హిప్ రీప్లేస్‌మెంట్ ఆప‌రేష‌న్ చేయాల్సి ఉంటుంద‌ని చెప్పారు. అత‌ను తిరిగి న‌డిచే అవ‌కాశం త‌క్కువని కూడా చెప్పారు.

ఈ అనుకోని దెబ్బ‌కు బాధ క‌లిగినా…త‌న కుటుంబం ఆర్థికంగా ఇబ్బందులు ప‌డాల్సి ఉంటుంద‌నే భ‌యం ఊర్వ‌శిని మ‌రింత‌గా బాధించింది. దాంతో త‌న సంపాద‌న పెంచుకోవాల‌నే నిర్ణ‌యానికి వ‌చ్చారు. అప్ప‌టివ‌ర‌కు స‌ర్స‌రీ స్కూల్లో ఉద్యోగం చేస్తున్న ఊర్వ‌శి, భ‌ర్త‌ రెండ‌వసారి గాయ‌ప‌డిన త‌రువాత రోజు నుండి ఉద్యోగానికి వెళ్ల‌టం మానేశారు. ప‌దిహేను రోజుల త‌రువాత ఈ షాపుని తెరిచారు. ఇప్ప‌టికిప్పుడు త‌మ కుటుంబానికి వ‌చ్చిన ఆర్థిక ఇబ్బందులేమీ లేక‌పోయినా…మ‌రీ చితికిపోయే వ‌ర‌కు ఎదురుచూడాల్సిన అవ‌స‌రం ఏముంది…ముందుగానే మ‌న ప్ర‌య‌త్నాలు మ‌నం చేయ‌వ‌చ్చు క‌దా అంటారామె. అందుకే టీచ‌రు జాబ్‌కంటే టిఫిన్ బండి ద్వారా ఎక్కువ‌గా సంపాదించ‌వ‌చ్చ‌నే ఆలోచ‌న‌తో ఈ అడుగు వేశారు. త‌న‌కి వంట చేయ‌టం చాలా ఇష్ట‌మ‌ని కూడా ఊర్వ‌శి అంటున్నారు.

ఆర్థిక ఇబ్బందుల కార‌ణంగా త‌న ఇద్ద‌రు పిల్ల‌ల‌ను స్కూలు మార్చ‌డం త‌న‌కు ఇష్టం లేదంటున్నారు ఊర్వ‌శి. భ‌ర్త సంపాద‌న ఆగిపోయిన త‌రువాత కూడా అదే జీవ‌న‌శైలిని కొన‌సాగిస్తున్నారామె. గ్రాడ్యుయేష‌న్ చేసిన ఊర్వ‌శి ఆంగ్లం బాగా మాట్లాడ‌గ‌ల‌రు. మొద‌ట ఆమె త‌న ఆలోచ‌న‌ని చెప్పిన‌పుడు ఇంట్లోవారు ఒప్పుకోలేదు. మ‌న స్టేట‌స్‌కి అది సూట‌వ‌దు అంటూ ఆమెని ఆపే ప్ర‌య‌త్నం చేశారు. అయితే ఆమె త‌న ప‌ట్టుని విడువ‌లేదు. ఊర్వ‌శి… స్టాల్ గురించి…. సోల్ స్టిర్రింగ్ బై సునాలి….అనే ఫేస్ బుక్ పేజిలో వ‌చ్చాక ఆమె వ్యాపారం మ‌రింత‌గా పెరిగింది. ఆ పోస్టుకి వేల‌ల్లో లైకులు, షేర్లు వచ్చాయి. ఊర్వ‌శి ఉద‌యం ఎనిమిది‌న్న‌ర నుండి సాయంత్రం నాలుగున్న‌ర వ‌ర‌కు స్టాల్‌ని న‌డుపుతున్నారు. రోజుకి 2,500 నుండి మూడువేల రూపాయ‌ల వ‌ర‌కు సంపాదిస్తున్నాన‌ని ఇది త‌న‌కు సంతృప్తిని క‌లిగిస్తోంద‌ని చెబుతున్నారామె.

త‌న‌కు వంట తెలిసినా… రోడ్డు ప‌క్క బండ్ల‌లో తినే క‌స్ట‌మ‌ర్ల‌తో ఎలా వ్య‌వ‌హ‌రించాలో తెలుసుకోవాల్సి ఉందంటున్నారామె. ఊర్వ‌శి మూడు రోజుల‌కంటే మించి ఆ వ్యాపారం చేయ‌లేద‌నుకున్న ఇంట్లో వారు ఇప్పుడు ఆమెను చూసి ఆశ్చ‌ర్య‌ పోతున్నారు. ఊర్వ‌శి త్వ‌ర‌లో ఓ రెస్టారెంట్ ని ప్రారంభించే ఉద్దేశంలో ఉన్నారు. ఫేస్‌ బుక్‌లో త‌న గురించి పోస్ట్ వ‌చ్చాక త‌న లాంటి చాలామంది మ‌హిళ‌లు ఫోన్ చేసి స‌ల‌హాలు అడుగుతున్నార‌ని ఊర్వ‌శి అంటున్నారు. మొత్తానికి…. అంత‌స్తు, హోదా…లాంటి వాటికి నిజంగా రూపమంటూ ఉండ‌దు…. అవి మన మ‌న‌సులోని ఫీలింగ్స్ మాత్ర‌మే అని ఊర్వ‌శి రుజువు చేశారు.