తాము ప‌నిచేయ‌క‌పోతే ఫ‌లిత‌మెంటో....దళితులు తెలియ‌చెప్పారు!
గుజ‌రాత్‌లో దళితులు త‌మ‌పై జ‌రుగుతున్న దాడుల‌కు ఎదురు తిరిగారు. ఉనా తాలూకాలోని మోటా స‌మ‌దియాలా గ్రామంలో ఈ నెల 11న కొంత‌మంది యువ‌కుల‌ను…గోవు చ‌ర్మం వ‌లిచారంటూ జీపుకి క‌ట్టేసి కొట్టిన సంగ‌తి తెలిసిందే. అయితే ఆ ఆవుని సింహం చంపిన‌ట్టుగా సీఐడి ద‌ర్యాప్తులో తేలింది. ఈ నేప‌థ్యంలో తాము జంతువుల కళేబరాలను తీసి, ఆయా ప్రాంతాల‌ను శుభ్రం చేయ‌టం, గోవుల చ‌ర్మం వలవటం చేయ‌బోయ‌ని దళితులు చెప్పేశారు. దాంతో ఉత్త‌ర గుజరాత్, సౌరాష్ట్ర‌ల్లోని గ్రామీణ ప్రాంతాలు దుర్గంధంతో […]
గుజ‌రాత్‌లో దళితులు త‌మ‌పై జ‌రుగుతున్న దాడుల‌కు ఎదురు తిరిగారు. ఉనా తాలూకాలోని మోటా స‌మ‌దియాలా గ్రామంలో ఈ నెల 11న కొంత‌మంది యువ‌కుల‌ను…గోవు చ‌ర్మం వ‌లిచారంటూ జీపుకి క‌ట్టేసి కొట్టిన సంగ‌తి తెలిసిందే. అయితే ఆ ఆవుని సింహం చంపిన‌ట్టుగా సీఐడి ద‌ర్యాప్తులో తేలింది. ఈ నేప‌థ్యంలో తాము జంతువుల కళేబరాలను తీసి, ఆయా ప్రాంతాల‌ను శుభ్రం చేయ‌టం, గోవుల చ‌ర్మం వలవటం చేయ‌బోయ‌ని దళితులు చెప్పేశారు. దాంతో ఉత్త‌ర గుజరాత్, సౌరాష్ట్ర‌ల్లోని గ్రామీణ ప్రాంతాలు దుర్గంధంతో కునారిల్లుతున్నాయి. ఆరోగ్య స‌మ‌స్య‌లు చుట్టుముడ‌తాయ‌ని ప్ర‌జ‌లు ఆందోళ‌న చెందుతున్నారు. గ‌ణ‌ప‌తి రైల్వే క్రాసింగ్ వ‌ద్ద ఓ గేదె శ‌రీరం కుళ్లిపోయి భ‌రించ‌లేని దుర్వాస‌న వ‌స్తోంద‌ని సురేంద్ర‌న‌గ‌ర్ అనే ప్రాంత వాసులు చెబుతున్నారు.
ఊనా సంఘ‌ట‌న త‌రువాత తాము మృత కళేబరాలను సేక‌రించ‌డం, మ‌ర‌ణించిన ఆవుల తోలు వలవటం… ప‌నుల‌ను నిలిపివేశామ‌ని 63 సంవ‌త్స‌రాల ధంజీ మ‌క్వానా చెప్పాడు. బిజెపి కౌన్సిల‌న్ అయిన మ‌క్వానాని స్థానిక పంజ్రాపోల్ నిర్వాహ‌కులు వ‌చ్చి ..త‌మ శాల‌కు వ‌చ్చి మృత కళేబరాలను తీసుకువెళ్లాల్సిందిగా కోర‌గా అత‌ను త‌మ నిర్ణ‌యం తెలిపాడు.
గుజ‌రాత్‌లో ఆవులు గేదెలు, ఎద్దులు త‌దిత‌ర ప‌శువులు మొత్తం క‌లిపి ఒక కోటి వ‌ర‌కు ఉంటాయ‌ని ప‌శు సంవ‌ర్ద‌క‌శాఖ లెక్క‌లు చెబుతున్నాయి. వీటిలో రోజూ క‌నీసం రోజూ 2,500 ప‌శువులు మ‌ర‌ణిస్తుంటాయి. అనారోగ్యంతో వృద్ధాప్యంతో మ‌ర‌ణానికి చేరువ‌గా ఉన్న ప‌శువులు పంజ్రాపోల్‌ల‌కు చేరుతుంటాయి.
దళితులు త‌మ నిర్ణ‌యాన్ని ప్ర‌క‌టించ‌డంతో చుట్టుప‌క్క‌ల ఉన్న యాభై గ్రామాల స‌ర్చంచ్‌ల‌కు పంజ్రాపోల్‌కి ఆవుల‌ను పంప‌వ‌ద్ద‌ని ప్ర‌త్యేకంగా తాము చెబుతున్న‌ట్టుగా ఓ పంజ్రాపోల్ తాలూకూ నిర్వాహ‌కులు చెబుతున్నారు. గుజరాత్ వ్యాప్తంగా ఉన్న పంజ్రాపోల్‌ల‌లో దాదాపు రెండుల‌క్ష‌లకు పైగానే ప‌శువులు ఉంటాయ‌ని తెలుస్తోంది. ప‌శుక‌ళేబ‌రాల‌ను తీసుకువెళ్లే దళితులు ఇప్పుడు ఆ ప‌నిని తాము బ‌హిష్క‌రించామ‌ని చెబుతున్నార‌ని మెహ‌సానా మున్సిపాలిటీ శానిట‌రీ ఇన్‌స్పెక్ట‌ర్ విక్ర‌మ్ దేవే అన్నారు. తాము నేలను త‌వ్వే మిష‌న‌రీ స‌హాయంతో నాలుగు గేదెల‌ను పూడ్చాల్సి వ‌చ్చింద‌ని ఓ పంజ్రాపోల్ కోఆర్డినేట‌ర్ తెలిపాడు.
పెరుగుతున్న దాడులు…మోడీ మౌనం
ఇదిలా ఉండ‌గా మ‌ధ్య ప్ర‌దేశ్‌లోని మంద్‌సౌర్ రైల్వే స్టేష‌న్‌లో ఇద్ద‌రు ముస్లిం మ‌హిళ‌ల‌పై గో సంర‌క్ష‌కులుగా భావిస్తున్న వ్య‌క్తులు దాడి చేసి తీవ్రంగా కొట్టారు. వారు అక్ర‌మంగా ఆవు మాంసం త‌ర‌లిస్తున్నార‌ని ఆరోపించ‌గా, త‌రువాత వారివ‌ద్ద ఉన్న‌ది ఎద్దు మాంసంగా తేలింది. మ‌హిళ‌ల‌పై దాడి జ‌రుగుతున్న‌పుడు చోద్యం చూసిన పోలీసులు త‌రువాత అప్ర‌మ‌త్తులై వారికి ర‌క్ష‌ణ క‌ల్పించారు. అయితే మ‌హిళ‌ల‌ను కొట్టిన‌వారిని మాత్రం అరెస్టు చేయ‌లేదు. మ‌హిళ‌ల‌ను మాత్రం అరెస్టు చేసి స్థానిక‌కోర్టులో ప్ర‌వేశ‌పెట్ట‌గా, కోర్టువారికి జ్యుడిషియ‌ల్ రిమాండ్‌ విధించింది. ఈ అంశంపై బుధ‌వారం రాజ్య స‌భ ద‌ద్ద‌రిల్లింది. కాంగ్రెస్, బిఎప్సీ స‌భ్యులు న‌రేంద్ర మోడీ ద‌ళిత వ్య‌తిరేకి అంటూ తీవ్రంగా మండిప‌డ్డారు. దళితులు, ముస్లింల‌పై దాడులు జ‌రుగుతున్నా మోడీ మౌనంగా ఉంటున్నార‌ని, చాయ్‌పే చ‌ర్చా మ‌న్‌కీ బాత్‌లో ప‌లు అంశాల‌ను చ‌ర్చించే మోడీ ఈ విష‌యం గురించి ఎందుకు మాట్లాడ‌ర‌ని బిఎస్‌పి అధినేత్రి మాయావ‌తి ప్ర‌శ్నించారు. సంఘ్ ప‌రివార్ సంస్థ‌లు గోర‌క్ష పేరుతో గూండాగిరి చేస్తున్నా, ప‌రివార్ సంస్థ‌ల అక్ర‌మాల‌ను అధికారులు ప‌ట్టించుకోక‌పోవ‌టం లేద‌ని ఇదంతా ఒక ఒప్పందం ప్ర‌కార‌మే జ‌రుగుతున్న‌ట్టుగా ఉందంటూ…కాంగ్రెస్ పార్టీ సైతం మోడీ మౌనంగా ఎందుకున్నారో చెప్పాలంటూ నిల‌దీసింది.