శత్రుఘ్నసిన్హాను కుక్కతో పోల్చిన బీజేపీ ఎంపీ

వాహనం కదులుతున్నప్పుడు వెంట పడే కుక్క ఆ వాహనం తన వల్లే కదులుతుందనుకుంటుందని, శత్రుఘ్నసిన్హా వ్యవహారం అలా ఉందని భారతీయ జనతాపార్టీ ఎంపీ కైలాస్‌ విజయవర్గీయ వ్యాఖ్యానించారు. బీహార్‌లో ఓటమిపై ప్రధానమంత్రి నరేంద్ర మోదీ తదితర నాయకులపై నిందలేసిన శత్రుఘ్నసిన్హాపై ఆయన విరుచుకు పడ్డారు. కేవలం ఒక వ్యక్తితోనే పార్టీ నడుస్తుందనుకుంటే పొరపాటని, తమ వల్లే పార్టీ మనుగడ సాగిస్తుందనుకుని అనుకుంటే అంతకన్నా తెలివి తక్కువ తనం మరొకటి ఉందని ఆయన అన్నారు. పార్టీ నుంచి ఎంతో పొందిన ఆయన బీజేపీకి సేవ చేయాల్సింది పోయి విమర్శలు చేయడం ఆయన స్థాయికి తగదని ఆయన అన్నారు. పార్టీ నుంచి లబ్ది పొందిన ప్రతి ఒక్కరూ పార్టీకి ఎంత విశ్వాసంగా ఉండాలో… ఏ విధంగా ముందుకు తీసుకువెళ్ళాలో ఎవరికి వారు విజ్ఞత ప్రదర్శించి తెలుసుకోవలసిన అంశమని విజయ వర్గీయ అన్నారు. పార్టీ ఒక వ్యక్తి వల్ల మనుగడ సాగదని తెలుసుకోవాలని, సమిష్టితత్వం ప్రతి ఒక్కరూ అలవరుచుకోవాలని ఆయన హితవు చెప్పారు. ఓడిపోయిన వారు మౌనంగా హూందాగా వ్యవహరిస్తుంటే బయట ఉన్నవారు అనవసరంగా నోరు పాడేసుకుంటున్నారని పరోక్షంగా శత్రుఘ్నసిన్హాను ఉద్దేశించి అన్నారు.