అమ్మత్యాగం వృధా కానివ్వను- ధృవ్ జురెల్!

ఇంగ్లండ్ తో టెస్టు సిరీస్ కు ఎంపికైన భారత యువక్రికెటర్ ధృవ్ జురెల్ గాల్లో తేలిపోతున్నాడు. అమ్మత్యాగం వృధా కానివ్వబోనని ప్రకటించాడు.

పేదరికం, కష్టాల నడుమ పెరిగిన క్రికెట్ వీరుల వెనుక ఒక్కో రకం కథ ఉంటుంది. నాన్నకష్టం, అమ్మత్యాగం, కుటుంబసభ్యుల ప్రోత్సాహం సైతం ఉండితీరుతుంది. దానికి భారత యువ వికెట్ కీపర్ బ్యాటర్ 22 సంవత్సరాల ధృవ్ జురెల్ ఏమాత్రం మినహాయింపు కాదు.

బ్యాటు లేదు...క్రికెట్ కిట్ అసలే లేదు...

క్రికెటర్ కావాలంటే బ్యాటు, బంతి ఉండితీరాలి. అదే భారతజట్టులో చోటు సంపాదించే క్రికెటర్ గా ఎదగాలంటే మాత్రం సొంత క్రికెట్ కిట్ ఉండి తీరాలి. అయితే..ప్రాధమిక దశలో బ్యాటు, కిట్ ల కోసం నాన్నఅమ్మలతో పోరాడి..ఆ తరువాత భారతజట్టులో చోటు కోసం పోటీపడి సఫలమయ్యాడు ధృవ్ జురెల్. కేవలం 22 సంవత్సరాల వయసుకే భారత టెస్టు జట్టులో చోటు సంపాదించడం ద్వారా వార్తల్లో నిలిచాడు. ఐసీసీ టెస్టు లీగ్ లో భాగంగా ఇంగ్లండ్ తో ఈనెల 25 నుంచి జరిగే ఐదుమ్యాచ్ ల సిరీస్ లోని మొదటి రెండు టెస్టుల కోసం బీసీసీఐ ప్రకటించిన 16 మంది సభ్యులజట్టులో యూపీ వికెట్ కీపర్ బ్యాటర్ ధృవ్ జురెల్ కు సైతం చోటు దక్కింది. హైదరాబాద్, విశాఖపట్నం వేదికలుగా జరిగే మొదటి రెండుటెస్టు మ్యాచ్ ల్లో పాల్గొనే భారతజట్టు సభ్యుడిగా..రోహిత్ శర్మ, విరాట్ కొహ్లీ, అశ్విన్ లాంటి దిగ్గజ ఆటగాళ్లతో కలసి డ్రెస్సింగ్ రూమ్, ప్రాక్టీసు సెషన్లు పంచుకొనే అరుదైన అవకాశం సొంతం చేసుకొన్నాడు.

14 ఏళ్ల వయసు నుంచే...

ఉత్తరప్రదేశ్ లోని ఓ దిగువ మధ్యతరగతి కుటుంబం నుంచి వచ్చిన ధృవ్ జురెల్ 14 సంవత్సరాల చిరుప్రాయంలో క్రికెట్ అంటే మక్కువ పెంచుకొన్నాడు. చేతిలో బ్యాటు, భుజానికి కిట్ బ్యాగు లేకుండానే క్రికెటర్ కావాలని కలలు కన్నాడు. అయితే..కార్గిల్ యుద్ధవీరుడు, భారత మాజీ సిపాయి నేమ్ సింగ్ జురెల్ కు మాత్రం తన కొడుకు క్రికెట్ అంటూ సమయం వృధా చేయడం ఏమాత్రం ఇష్టం కాలేదు. బుద్ధిగా చదువుకొని ఓ చిన్న ప్రభుత్వ ఉద్యోగం సంపాదించుకొంటే చాలునని భావించారు. కొడుకు ధృవ్ క్రికెట్ అన్న ప్రతిసారీ తిట్లదండకం అందుకోడం నిత్యకృత్యమైపోయింది.

తానే క్రికెట్టే ఆడతానంటూ మంకుపట్టు పట్టడంతో 800 రూపాయలు చేబదులు తెచ్చి మరీ తన తండ్రి బ్యాటు కొనిచ్చినా తనకు సొంతంగా కిట్ బ్యాగ్ కావాలంటూ ధృవ్ మంకు పట్టు పట్టాడు. కిట్ బ్యాగ్ కొనటానికి 3వేల రూపాయలు తమదగ్గర లేవంటూ తండ్రి తెగేసి చెప్పడంతో ఇంటినుంచి పారిపోరాడానికి సిద్ధమయ్యాడు. ధృవ్ తల్లి మాత్రం తన మెడలోని బంగారు గొలుసు అమ్మి కిట్ బ్యాగు కొనివ్వడంతో తన క్రికెట్ జీవితాన్ని మొదలు పెట్టాడు.

జూనియర్ ప్రపంచకప్ విజేతగా...

సబ్ జూనియర్ స్థాయి నుంచి నిలకడగా రాణిస్తూ వచ్చిన ధృవ్ నమ్మదగిన వికెట్ కీపర్ బ్యాటర్ గా గుర్తింపు తెచ్చుకొన్నాడు. అండర్ -19 ప్రపంచకప్ లో పాల్గొనే భారతజట్టులో చోటు సంపాదించాడు.

శుభ్ మన్ గిల్, యశస్వి జైశ్వాల్, రవి బిష్నోయ్ లాంటి ఇండియా ప్లేయర్లతో కలసి జూనియర్ ప్రపంచకప్ విజేతగా నిలిచిన భారతజట్టులో సభ్యుడిగా ధృవ్ గుర్తింపు తెచ్చుకొన్నాడు.

భారత-ఏ జట్టుతో పాటు ఐపీఎల్ లో రాజస్థాన్ రాయల్స్ జట్టులోనూ ధృవ్ చోటు సాధించాడు. సీజన్ కు 20 లక్షల రూపాయల కాంట్రాక్టు పై 'ఇంపాక్ట్ ప్లేయర్' కోటాలో జైపూర్ ఫ్రాంచైజీకి ఆడుతూ వస్తున్నాడు.

ఐపీఎల్ ద్వారా వచ్చే ఆదాయంతో ధృవ్ ఆర్థిక కష్టాలు ఒక్కసారిగా తీరిపోయాయి. పైగా రంజీట్రోఫీలో యూపీ జట్టుకు ఆడుతూ దండిగానే ఆర్జించే స్థాయికి ధృవ్ చేరుకొన్నాడు.

సఫారీగడ్డపై సత్తా చాటిన ధృవ్...

దక్షిణాఫ్రికా గడ్డపై దక్షిణాఫ్రికా- ఏ జట్టుతో జరిగిన రెండుమ్యాచ్ ల టెస్టు సిరీస్ లో ధృవ్ నిలకడగా రాణించాడు. కీలక రెండోటెస్టులో 69 పరుగులతో కీలక ఇన్నింగ్స్ ఆడాడు.

2024 రంజీసీజన్ ప్రారంభమ్యాచ్ లో కేరళపై 63 పరుగులు సాధించడం ద్వారా సెలెక్టర్ల దృష్టిని ఆకర్షించాడు. చివరకు భారత టెస్టుజట్టులో బ్యాకప్ వికెట్ కీపర్ గా చోటు సంపాదించుకోగలిగాడు.

గతేడాది విదర్బతో రంజీమ్యాచ్ ద్వారా అరంగేట్రం చేసిన ధృవ్ జురెల్ కు ఇప్పటి వరకూ ఆడిన 15 ఫస్ట్ క్లాస్ మ్యాచ్ ల్లో 790 పరుగులతో 46 సగటు సాధించిన రికార్డు ఉంది. ఓ సెంచరీతో పాటు ఐదు హాఫ్ సెంచరీలు సైతం ధృవ్ ఖాతాలో చేరాయి.

తనకు అవకాశం దొరికితే భారత్ సీనియర్ జట్టులో సభ్యుడిగా సత్తా చాటుకోడానికి సిద్ధమని ధృవ్ ప్రకటించాడు. తాను క్రికెటర్ గా ఎదగడం వెనుక అమ్మానాన్నల ప్రోత్సాహం, కృషి, పట్టుదల ఉన్నాయని, అమ్మత్యాగాన్ని తాను వృధాపోనివ్వనని తెలిపాడు.

జైపూర్ ఫ్రాంచైజీ సభ్యుడిగా కెప్టెన్ సంజు శాంసన్, సీనియర్ ప్లేయర్ జోస్ బట్లర్ తనను ఎంతగానో ప్రోత్సహిస్తున్నారని, తమ టీమ్ డైరెక్టర్ కుమార సంగక్కర తనకు కొండంత అండని ఈ యువవికెట్ కీపర్ బ్యాటర్ చెబుతున్నాడు.

భారత టెస్టు వికెట్ కీపర్ గా రిషభ్ పంత్ స్థానంలో చేరిన ఇషాన్ కిషన్ అందుబాటులో లేకపోడంతో..ఇషాన్ కు బదులుగా ధృవ్ జురెల్ కు చోటు దక్కింది.