టీమిండియా నయా సంచలనం యశస్వి జైశ్వాల్ రికార్డుల మోత మోగిస్తున్నాడు. ఇంగ్లండ్‌తో రాజ్‌కోట్‌ వేదికగా జరిగిన మూడో టెస్టు రెండో ఇన్నింగ్స్‌లో డబుల్‌ సెంచరీతో అదరగొట్టిన యశస్వి.. ఓ అరుదైన రికార్డును తన ఖాతాలో వేసుకున్నాడు. 147 ఏళ్ల టెస్టు క్రికెట్ చరిత్రలో ఈ ఫీట్ సాధించిన ఏకైక ప్లేయర్‌గా నిలిచాడు యశస్వి.
ఇంతకీ యశస్వి నమోదు చేసిన అరుదైన రికార్డు ఏంటంటే.. ఒక టెస్టు సిరీస్‌లో 20కి పైగా సిక్సర్లు కొట్టడం. ఇప్పటివరకూ టెస్టు క్రికెట్ చరిత్రలో ఈ ఫీట్‌ను ఏ ఆటగాడు సాధించలేదు. తాజాగా జరిగిన మూడో టెస్టులో 12 సిక్సర్లు బాదాడు యశస్వి. దీంతో ఓ ఇన్నింగ్స్‌లో అత్యధిక సిక్సర్లు బాదిన రికార్డును సమం చేశాడు. ఇక ఫస్ట్ టెస్టులో మూడు సిక్సర్లు, రెండో టెస్టులో ఏడు సిక్సర్లు బాదాడు. మొత్తంగా ఇప్పటివరకూ ఇంగ్లండ్‌తో జరిగిన 3 టెస్టుల్లో 22 సిక్సర్లు కొట్టి కొత్త చరిత్ర సృష్టించాడు యశస్వి.
ఇక యశస్వి సిక్సర్ల మోతతో ఇండియా కూడా ఓ అరుదైన రికార్డును సొంతం చేసుకుంది. ఓ సిరీస్‌లో అత్యధిక సిక్సర్లు నమోదు చేసిన టీమ్‌గా రికార్డుల కెక్కింది. ఇప్పటివరకూ జరిగిన మూడు టెస్టుల్లో కలిపి 48 సిక్సర్లు నమోదు చేసింది టీమిండియా. గతంలోనూ ఈ రికార్డు టీమిండియా పేరిటే ఉండేది. 2019లో సౌతాఫ్రికాతో జరిగిన టెస్టు సిరీస్‌లో 47 సిక్సర్లు నమోదు చేసింది. ఇక ఈ జాబితాలో 43 సిక్సర్లతో ఇంగ్లండ్‌ థర్డ్‌ ప్లేసులో, 40 సిక్సర్లతో ఆస్ట్రేలియా నాలుగో స్థానంలో నిలిచాయి.
