ఏ డౌట్ వచ్చినా వెంటనే ఇంటర్నెట్ లో వెతకడం ఈ రోజుల్లో బాగా అలవాటైంది. అయితే ఇంటర్నెట్‌లో.. ఏదైనా సెర్చ్ చేసి తెలుసుకోవచ్చు. కానీ హెల్త్ గురించి మాత్రం ఇంటర్నెట్‌లో చూసి ఒక నిర్ణయానికి రాకూడదు. శరీరంలో ఏ చిన్న మార్పు వచ్చినా గూగుల్‌ని అడిగి.. అందులో వచ్చే ఇన్ఫర్మేషన్ చూసి హెల్త్ మీద బెంగ పెట్టుకుంటుంటారు. దీన్నే ‘సైబర్ కాండ్రియా’ అంటారు. మామూలు జబ్బుల ఇది ఇంకా పెద్ద జబ్బు అని డాక్టర్లు చెప్తున్నారు.
సైబర్ కాండ్రియా అంటే.. అదేదో చిన్న భయం లాంటిది కాదు. ఇదొక మానసిక సమస్య అని సైకాలజిస్టులు చెప్తున్నారు. భయమే చాలామందిని రోగాల బారిన పడేలా చేస్తుంది. సైబర్ కాండ్రియా వల్ల స్ట్రెస్, డిప్రెషన్, యాంగ్జైటీ లాంటి సమస్యలు వస్తాయంటున్నారు. ట్రీట్మెంట్ కోసం హాస్పిటల్స్‌కి వచ్చేవాళ్లలో ముప్పై శాతం మంది అనవసరమైన భయాలతోనే వస్తున్నారని సర్వేలు చెప్తున్నాయి. మామూలు లక్షణాలకు కూడా పెద్దపెద్ద జబ్బులేమో అనే భయపడడం, కాదని డాక్టర్లు కన్ఫర్మ్ చేసినా ఆ భయాలు వెంటాడుతునే ఉండడం ఇటీవలి కాలంలో ఎక్కువైంది. ఏయే లక్షణాలు సైబర్ కాండ్రియా కిందకు వస్తాయంటే..
స్క్రీన్ టైం
మూడు గంటల కంటే ఎక్కువ స్క్రీన్ టైం ఉన్నవాళ్లు ఇంటర్నెట్‌లో ఏది ఎక్కువగా సెర్చ్ చేస్తున్నారో గమనించుకోవాలి. రెగ్యులర్‌‌గా చూసే యూట్యూబ్ వీడియోలు, తరచూ వాడే యాప్‌లు, గూగుల్‌లో ఎక్కువగా సెర్చ్ చేసే విషయాలు ఒకసారి చెక్ చేసుకోవాలి. వాటిలో హెల్దీ హ్యాబిట్స్, ఫిట్‌నెస్ వీడియోలు ఉంటే పర్వాలేదు. కానీ మీకు వచ్చే సింప్టమ్స్ సెర్చ్ చేసే అలవాటు ఉంటే సైబర్ కాండ్రియా బారిన పడే ప్రమాదముంది.
హెల్త్ కాన్షియస్ ఎక్కువా?
ఆరోగ్యం మీద అందరికీ శ్రద్ధ ఉంటుంది. కానీ ‘ఆ శ్రద్ధ ఎంత వరకు?’ అనేది ఒకసారి చెక్ చేసుకోవాలి. తరచూ వస్తున్న సమస్యల గురించి , శరీరంలో వస్తున్న మార్పుల గురించి కేర్ తీసుకుని, లైఫ్‌స్టైల్‌లో మార్పులు చేసుకోవడం మంచి హ్యాబిట్. అలా కాకుండా ఏ చిన్న సమస్య వచ్చినా దాని గురించి పూర్తిగా తెలుసుకోవాలని ఆత్రుత పడడం, ఇంటర్నెట్‌లో సెర్చ్ చేయడం లాంటి భయాలు ఉన్నట్టయితే సైబర్ కాండ్రియాకు దగ్గర్లో ఉన్నట్టే.
సొంత ట్రీట్మెంట్
కొంత మందికి ప్రతిదానికి హాస్పిటల్‌కు వెళ్లడం ఇష్టం ఉండదు. ఎవరో ఒకరి సలహా అడిగో లేదా ఇంటర్నెట్‌లో వెతికో సొంతగా ట్రీట్మెంట్ తీసుకుంటారు. ఆ క్రమంలో రెండు, మూడు సార్లు ఇంటర్నెట్‌లో ఏదైనా తప్పుడు ఇన్ఫర్మేషన్ వస్తే.. అంతే సంగతి. లేనిపోని వ్యాధుల భయాలు పట్టుకుంటాయి. ఈ భయాలే మెంటల్ ఇల్‌నెస్‌కు దారి తీస్తాయి. ఇది కూడా సైబర్ కాండ్రియా కిందకే వస్తుంది.
జాగ్రత్తలు ఇవే.
టెక్నాలజీని సరిగ్గా వాడుకోవడం స్మార్ట్ అనిపించుకుంటుంది. కానీ, మరీ విపరీతంగా వాడితే అది ఒక జబ్బుగా మారుతుంది. అందుకే హెల్త్ విషయంలో స్మార్ట్‌గా ఉండడం కన్నా, ప్రాక్టికల్‌గా ఉండడం ముఖ్యం.
రోజు వారి పనుల్లో ఎంత బిజీగా ఉన్నా.. హెల్త్ విషయాల్లో తప్పని సరిగా డాక్టర్ సలహా తీసుకోవడమే మేలు. అలాగే శరీరం తీరును బట్టి ట్రీట్మెంట్ ఉంటుంది కాబట్టి రెగ్యులర్‌‌గా ఒకే డాక్టర్ దగ్గరకు వెళ్లడం లేదా ఫ్యామిలి డాక్టర్‌‌ను నియమించుకోవడం మంచిది.
తమను తాము ఎప్పుడూ తక్కువ చేసుకోకూడదు. ఊరికే ఏ రోగాలు రావు. ఒకవేళ వచ్చినా వాటికి ట్రీట్మెంట్ ఉంటుంది. కాబట్టి భయపడాల్సిన అవసరం లేదు.
హెల్త్ మీద ఎక్కువ శ్రద్ధ ఉంటే హ్యాబిట్స్ చేంజ్ చేసుకోవడం వల్ల బెటర్ చేసుకోవచ్చు. అంతే కానీ భయపడితే ఆరోగ్యం మెరుగుపడదు. భయాలు రుగ్మతలను ఇంకా పెంచుతాయి.
రోగానికి ట్రీట్మెంట్ ఎంత అవసరమో, ధైర్యంగా ఉండడం కూడా అంతే అవసరం. పాజిటివిటీతో రోగాలను కూడా నయం చేసుకోవచ్చు. కాబట్టి పాజిటివిటీని ఎప్పుడూ కోల్పోకూడదు. అలాగే ఎప్పుడు ఏ భయం వచ్చినా డాక్టర్‌‌ను సంప్రదించాలి తప్ప ఇంటర్నెట్‌లో చూసి రోగాన్ని నిర్ధారించుకోకూడదు.
ఒకవేళ ఇంటర్నెట్‌లో సింప్టమ్స్ వెతికినా.. ‘ఆ సమాచారం సరైనదేనా?’, ‘ఎక్కడి నుంచి సేకరించారు?’, ‘ఎవరు రాశారు?’ లాంటి విషయాలు కూడా చెక్ చేసుకోవాలి.
మొబైల్, ఇంటర్నెట్ వాడకాన్ని వీలైనంత వరకూ తగ్గిస్తే అంత మంచిది. స్క్రీన్ టైం తగ్గించి , వ్యాయామం, మెడిటేషన్ టైంను పెంచుకుంటే మరింత హెల్దీగా ఉండొచ్చు.
