ఉత్తరాఖండ్‌లో యూనిఫాం సివిల్‌ కోడ్‌

ఉత్తరాఖండ్‌ ప్రభుత్వం తమ రాష్ట్రంలో యూనిఫాం సివిల్‌ కోడ్‌ అమల్లోకి తెచ్చింది. దేశంలోనే యూసీసీని అమలు చేసిన మొట్టమొదటి రాష్ట్రం తమదని ముఖ్యమంత్రి పుష్కర్‌సింగ్‌ దామీ ప్రకటించారు. సోమవారం డెహ్రాడూన్‌లో యూసీసీ రూల్స్‌కు సంబంధించిన పోర్టల్‌ను ఆయన ప్రారంభించారు. ఈ సందర్భంగా దామీ మాట్లాడుతూ, ఇది తమ రాష్ట్ర ప్రజల, ఈ దేవభూమి ఘనత అని ప్రకటించారు. ప్రజలు తమను ఆశీర్వదించడంతో ప్రభుత్వం ఏర్పాటు చేశామన్నారు. రాష్ట్రంలోని కులాలు, మతాలకు చెందిన ప్రజలందరికీ సమాన హక్కులు ఈ చట్టం ద్వారా సమకూరుతాయన్నారు. ఇదే భారత రాజ్యాంగ నిర్మాత డాక్టర్‌ బీఆర్‌ అంబేద్కర్‌ కు నిజమైన నివాళి అని పేర్కొన్నారు.