మహాకుంభమేళా.. గణనీయంగా పెరిగిన విమాన టికెట్‌ ధరలు

యూపీలో మహాకుంభమేళా నిర్వహిస్తున్న నేపథ్యంలో ప్రయాగ్‌రాజ్‌కు వెళ్లే విమానాల టికెట్‌ ధరలు గణనీయంగా పెరిగాయి. ట్రావెల్‌ పోర్టల్‌ ఇక్సిగో విశ్లేషణ ప్రకారం గత ఏడాది ఈ సమయంలో మధ్యప్రదేశ్‌లోని భోపాల్‌ నుంచి ప్రయాగ్‌ రాజ్‌ టికెట్‌ ధర రూ. 2877గా ఉన్నది. ఆ ధర ఇప్పుడు ఏకంగా 498 శాతం పెరిగి రూ. 17,796 గా కొనసాగుతున్నది. జనవరి 13 నుంచి ఫిబ్రవరి 26 వరకు వన్‌ వే బుకింగ్‌ల సరాసరిన లెక్కగట్టడంతో ఈ మొత్తం తేలింది. ఢిల్లీ నుంచి ప్రయాగ్‌రాజ్‌ వెళ్లే విమానాల టికెట్‌ ధర 21 శాతం పెరిగి రూ. 5748 కి చేరింది. ముంబయి-ప్రయాగ్‌రాజ్‌ టికెట్‌ ధర 13 శాతం పెరిగి రూ. 6381 గా ఉన్నది.

బెంగళూరు-ప్రయాగ్‌రాజ్‌ మార్గంలో విమాన టికెట్‌ ధరలు 89 శాతం పెరిగాయి. బెంగళూరు-ప్రయాగ్‌రాజ్‌ సర్వీస్‌కు రూ. 11,158 వసూలు చేస్తున్నారు. అహ్మదాబాద్‌-ప్రయాగ్‌రాజ్‌ టికెట్‌ ధర 41 శాతం పెరిగి రూ. 10, 364గా ఉన్నది. మహాకుంభమేళా జరుగుతున్న ప్రయాగ్‌రాజ్‌కు సమీప నగరాలైన లఖ్‌నవూ, వారణాసి నగరాల టికెట్‌ ధరలు 3-21 శాతం పెరిగాయి.