ఒక పార్టీ రాజ్యాంగాన్ని హైజాక్‌ చేసేందుకు యత్నించింది
రాజ్యాంగ రూపకల్పనలో కీలక పాత్ర పోషించిన కొందరి పాత్ర విస్మరణకు గురైందన్న రాజ్‌నాథ్‌
రాజ్యాంగ నిర్మాణానికి కృషి చేసిన కొంతమంది ప్రయత్నాలను ఉద్దేశపూర్వకంగా విస్మరించారని రక్షణమంత్రి రాజ్‌నాథ్‌సింగ్‌ విమర్శించారు. భారత రాజ్యాంగాన్ని ఆమోదించుకొని 75వ ఏడాదిలోకి అడుగుపెట్టిన సందర్భంగా పార్లమెంటులో ప్రత్యేక చర్చ జరుగుతున్నది. కేంద్ర ప్రభుత్వం తరఫున లోక్‌సభలో ఈ చర్చను రాజ్‌నాథ్‌ ప్రారంభించారు.
రాజ్యాంగ రూపకల్పనలో కీలక పాత్ర పోషించిన కొందరి పాత్ర విస్మరణకు గురైంది. స్వాతంత్య్ర ఉద్యమ పోరాటస్ఫూర్తి నుంచి ఈ రాజ్యాంగం ఉద్భవించింది అని మంత్రి వెల్లడించారు. అప్పుడు రాజ్యాంగాన్ని రూపొందించడానికి ఏర్పాటైన కమిటీలో భాగం కాకపోయినా ఈ ప్రక్రియలో కీలక పాత్ర పోషించారంటూ మదన్‌ మోహన్‌ మాలవీయ, లాలా లజ్‌పత్‌ రాయ్‌, భగత్‌సింగ్‌, వీర్‌ సావర్కర్‌ వంటి ప్రముఖుల పేర్లను ప్రస్తావించారు. ఒక పార్టీ రాజ్యాంగాన్ని హైజాక్‌ చేసేందుకు యత్నించిందని కాంగ్రెస్‌పై పరోక్షంగా విమర్శలు చేశారు. ఈ ప్రకటనతో లోక్‌సభలో తీవ్ర గందరగోళం నెలకొన్నది. మంత్రి వ్యాఖ్యలను వ్యతిరేకిస్తూ విపక్ష సభ్యులు తీవ్ర నిరసన వ్యక్తం చేశారు. శనివారం వరకు కొనసాగే ఈ చర్చకు ముగింపు ప్రధాని మోడీ సమాధానం ఇస్తారు.
