ఎలిజిబెత్ రాణి లేఖ, 2085 వరకు చదివే వీల్లేదు.. ఎందుకో తెలుసా..?

కొంతమంది తాము చనిపోయిన తర్వాత జరగాల్సిన పనుల్ని వీలునామాలో రాస్తుంటారు. ఫలానా సంవత్సరంలోనే వీలునామా ఓపెన్ చేయాలని, అప్పటి వరకూ ఫలానా వారి సంరక్షణలో ఆస్తి ఉంటుందనే నిబంధన పెట్టేవారు కూడా ఉంటారు. ఇలాంటి లేఖనే బ్రిటన్ మహారాణి ఎలిజిబెత్-2 కూడా రాశారని తెలుస్తోంది. సిడ్నీ ప్రజల్ని ఉద్దేశించి ఆమె రాసిన ఆ లేఖను 2085 వరకు తెరవడానికి లేదని షరతు విధించారట. ఆ లేఖను 2085లో ఓ మంచి సందర్భం చూసి తెరచి చదవాలని, తన సందేశాన్ని సిడ్నీ వాసులకు వినిపించాలని కోరారట ఎలిజిబెత్-2. ఆమె మరణం తర్వాత ఇప్పుడీ లేఖ వ్యవహారం ఆసక్తికరంగా మారింది.

ఎలిజిబెత్ -2 కి ఆస్ట్రేలియాతో అవినాభావ సంబంధం ఉంది. ఆమె 16 సార్లు ఆస్ట్రేలియా పర్యటనకు వెళ్లారు. 1986, నవంబర్‌ లో ఎలిజబెత్-2 ఆస్ట్రేలియాలోని సిడ్నీ ప్రజలను ఉద్దేశించి ఓలేఖను తన స్వహస్తాలతో రాశారు. ప్రస్తుతం దానిని సిడ్నీలోని క్వీన్‌ విక్టోరియా భవనంలో ఓ రహస్య ప్రదేశంలో భద్రపరిచారు. అయితే, అందులో ఏముందో ఆమెకు మినహా ఎవరికీ తెలియదు. ఆమె ఇప్పుడు లేరు, కానీ ఆ లేఖను ఓపెన్ చేసి చదవడం కుదరని పని. ఎందుకంటే ఆ లేఖను 2085 వరకు ఓపెన్ చేయకూడదని ఆమే స్వయంగా షరతు పెట్టారు. '2085లో తగిన రోజు చూసుకొని ఈ లేఖను తెరవండి. సిడ్నీ ప్రజలకు నా సందేశాన్ని చేరవేయండి' అంటూ ఆనాటి సిడ్నీ మేయర్‌ ను ఉద్దేశించి రాణి ఆ లేఖను పంపించినట్టు తెలుస్తోంది. లేఖపై ఆమె సంతకం కూడా ఉంది.

లేఖలో ఏముంది..?

2085లోనే ఆ లేఖను ఓపెన్ చేయాలి అని స్పష్టమైన నిబంధన పెట్టారంటే.. ఆ సంవత్సరానికి ఆ లేఖకు ఏమైనా సంబంధం ఉంటుందా అనే అనుమానాలు కూడా ఉన్నాయి. రాణి బతికి ఉన్నప్పుడు ఈ లేఖ గురించి పెద్దగా చర్చ రాలేదు. ఆమె మరణం తర్వాత ఇప్పుడీ లేఖ విషయం ఆసక్తికరంగా మారింది. ఆమెకు మినహా అందులో ఏముందో ఎవరికీ తెలియదు. ఆమె ఇప్పుడు లేరు, అంటే 2085 వరకు ఆ సస్పెన్స్ వీడే అవకాశమే లేదు. ఆస్ట్రేలియాకు సంబంధించినంత వరకు బ్రిటన్ రాణి వదిలి వెళ్లిన జ్ఞాపకాల్లో ఇది అరుదైనది. అందుకే ఆ లేఖను వారు అత్యంత రహస్య ప్రదేశంలో ఉంచి భద్రంగా చూసుకుంటున్నారు.