సవతి కూతురుతో బిడ్డను కని.. సూక్తులు చెప్తున్న ఎలాన్ మస్క్ తండ్రి

ప్రపంచ కుబేరుడు, టెస్లా అధినేత ఎలాన్ మస్క్ ఇటీవల తన సహోద్యోగి ద్వారా ట్విన్స్‌కు జన్మనిచ్చిన వార్త అందరినీ ఆశ్చర్యపరిచింది. అయితే మస్క్ తండ్రి ఎరోల్ మస్క్ అంతకు మించి ఆశ్చర్యపరిచే వార్త చెప్పాడు. తన సవతి కూతురు (35)తో ఒక బిడ్డను కన్నట్లు 'ది సన్' అనే పత్రికకు ఇచ్చిన ఇంటర్వ్యూలో తెలిపాడు (అంటే త‌న భార్య‌కు మొద‌టి భ‌ర్త ద్వారా జ‌న్మించిన అమ్మాయితో అంటే కూతురుతో ఇప్పుడు ఇత‌ను స‌హ‌జీవ‌నం చేస్తున్నాడు.). ఎరోల్ మస్క్, తన భార్య మాయే హాల్డెమాన్‌‌తో 1979లో విడిపోయాడు. వారిద్దరికీ అప్పటికే ఎలాన్ మస్క్, కింబాల్ మస్క్, టోస్కా మస్క్ ఉన్నారు. అయితే వీళ్లిద్దరూ విడిపోయిన తర్వాత హేడే బెజుడెన్‌హౌట్‌ను పెళ్లి చేసుకున్నాడు.

కాగా, హేడే బెజుడెన్‌హౌట్‌కు అప్పటికే వివాహం అయ్యి విడిపోయింది. మొదటి భర్త ద్వారా ఆమెకు పుట్టిన బిడ్డే జానా బెజుడెన్‌హౌట్‌. అయితే ఎరోల్-హేడేకు ఇద్దరు పిల్లలు జన్మించారు. ఆ తర్వాత వారిద్దరు కూడా విడిపోయారు. కానీ ఎరోల్ మస్క్ తన సవతి కూతురు జానా బెజుడెన్‌హౌట్‌‌తో సహజీవనం చేస్తున్నాడు. దీంతో వారికి 2017లో ఎలియట్ రష్ అనే కుమారుడు జన్మించాడు. ఆ తర్వాత 2019లో మరో కుమారుడు జన్మించినట్లు తాజాగా ఎరోల్ వెల్లడించారు. మొదటి భార్య మాయే హాల్డె‌మాన్‌తో ముగ్గురు, రెండో భార్య హేడే బెజుడెన్‌హౌట్‌‌తో ఇద్దరు పిల్లలు, తాజాగా సవతి కూతురు ద్వారా మరో ఇద్దరు పిల్లలకు ఎరోల్ మస్క్ తండ్రయ్యాడు. ప్రస్తుతం అతడికి ఎలాన్ మస్క్‌తో కలిపి ఏడుగురు సంతానం.

ఈ విషయాన్ని ఎరోల్ మస్క్ 'ది సన్' పత్రికతో వెల్లడిస్తూ 'మనం ఈ భూమ్మీద ఉన్నది పునరుత్పత్తి కోసమే' అంటూ వ్యాఖ్యానించారు. ఎరోల్ మస్క్ దక్షిణాఫ్రికాలో జన్మించారు. ఇంజనీర్ అయిన ఎరోల్.. ఆ తర్వాత అక్కడే నివసిస్తున్నారు. తన సవతి కూతరుతో సహజీవనం చేస్తున్నాడని తెలిసి.. మస్క్ కుటుంబం అతడికి దూరంగా ఉంటోంది. ఈ విషయం తెలిసి నా కుటుంబం కోపంతో ఉన్నది. నాకు ఆ సంగతి తెలుసు. ఎందుకంటే నేను సహజీనవం చేస్తున్నది వాళ్ల సోదరితోనే కదా అని ఎరోల్ వ్యాఖ్యానించారు.