కేజీఎఫ్ ఫ్యాన్స్ కి గుడ్ న్యూస్.. పార్ట్‌-3 వచ్చేస్తోంది..! - హోంబలే ఫిల్మ్స్ ప్రకటన

ఒకప్పుడు కన్నడ సినిమాలంటే దేశమంతా చిన్నచూపు ఉండేది. అక్కడ ఎక్కువగా రీమేక్ సినిమాలు, త‌క్కువ‌ బడ్జెట్ సినిమాలు మాత్రమే తెరకెక్కేవి. ఆ భాషలో నిర్మించిన సినిమాలు మరెక్కడా ఆడేవి కావు. అయితే యష్ హీరోగా ప్రశాంత్ నీల్ దర్శకత్వంలో హోంబలే ఫిల్మ్స్ కన్నడలో నిర్మించిన కేజీఎఫ్ మూవీ దేశవ్యాప్తంగా సంచలన విజయం సాధించింది. ఇక ఈ సినిమాకు సీక్వెల్ గా వచ్చిన కేజీఎఫ్ -2 భారతీయ సినీ చరిత్రలో అత్యధిక వసూళ్లు సాధించిన సినిమాల్లో ఒకటిగా నిలిచింది.

కాగా, కొన్ని నెలల కిందట కేజీఎఫ్ సినిమాకు మూడో పార్ట్ కూడా రాబోతోందని వార్తలు వచ్చాయి. అయితే ఈ వార్తలను ఈ సినిమాలో హీరోగా నటించిన యష్ ఖండించారు. ఇప్పటికైతే మూడో పార్ట్ తీసే ఆలోచన లేదని తేల్చి చెప్పాడు. అయితే తాజాగా హోంబలే ఫిల్మ్స్ కేజీఎఫ్ మూవీ ఫ్యాన్స్ కి గుడ్ న్యూస్ చెప్పింది. కేజీఎఫ్ కు మూడో పార్ట్ కూడా తీయనున్నట్లు ప్రకటించింది.ఈ సినిమాకు కూడా ప్రశాంత్ నీల్ దర్శకత్వం వహిస్తారని పేర్కొంది. కేజీఎఫ్ -3 సినిమాకు సంబంధించి కథను సిద్ధం చేసే పనిలో ప్రశాంత్ నీల్ ఉన్నట్లు తెలిపింది.

ప్రశాంత్ నీల్ ప్రస్తుతం ప్రభాస్ హీరోగా సలార్ అనే సినిమా చేస్తున్నాడు. ఈ సినిమాను కూడా కేజీఎఫ్ మూవీలా రెండు పార్ట్ లుగా తెరకెక్కిస్తున్నారు. ఈ సినిమా షూటింగ్ ముగిసిన తర్వాత ప్రశాంత్ నీల్ కేజీఎఫ్- 3 స్క్రిప్ట్ పనులను మొదలు పెడతారని హోంబలే ఫిల్మ్స్ అధినేత విజయ్ కిరంగదూర్ తెలిపారు. హోంబలే ఫిల్మ్స్ ప్రస్తుతం సౌత్ లోని ప్రతి భాషలో సినిమాలు నిర్మిస్తోంది. అలాగే హిందీలో కూడా సినిమాలు తీస్తోంది. వచ్చే ఏడాది తమ బ్యానర్ నుంచి నాలుగైదు సినిమాలు, ఆ తర్వాత రెండేళ్లలో 12 నుంచి 14 చిత్రాలు విడుదల చేయడమే లక్ష్యంగా పనిచేస్తున్నట్లు విజయ్ కిరంగదూర్ తెలిపారు.