రూ.826 కోట్లతో కేబీఆర్‌ పార్క్‌ చుట్టూ ఫ్లై ఓవర్లు.. అండర్‌ పాస్‌లు
ఈపీసీ పద్ధతిలో టెండర్లు పిలిచేందుకు ప్రభుత్వ ఉత్తర్వులు
కేబీఆర్‌ పార్క్‌ చుట్టూ ఫ్లై ఓవర్లు, అండర్‌ పాస్‌ లు, రేడియల్‌ రోడ్ల నిర్మాణానికి ప్రభుత్వం అనుమతులు జారీ చేసింది. రూ.826 కోట్లతో ఇంజినీరింగ్‌ ప్రొక్యూర్‌మెంట్‌ కాంట్రాక్ట్‌ (ఈపీసీ) పద్ధతిలో ఈ పనులు చేయనుంది. కేబీఆర్‌ పార్క్‌ ఎంట్రన్స్‌ జంక్షన్‌, జూబ్లీ చెక్‌ పోస్ట్‌, రోడ్‌ నం.45 జంక్షన్‌, ఫిల్మ్‌ నగర్‌ జంక్షన్‌, అగ్రసేన్‌ మహరాజ జంక్షన్‌, క్యాన్సర్‌ హాస్పిటల్‌ జంక్షన్‌ లో ఈ ఫ్లై ఓవర్లు, అండర్‌ పాస్‌ ల నిర్మాణం చేపట్టనుంది. మొత్తం ఆరు జంక్షన్ల అభివృద్ధి, ఫ్లై ఓవర్లు, అండర్‌ పాస్‌ లను కనెక్ట్‌ చేసేలా రేడియల్‌ రోడ్లను నిర్మించనుంది. మొత్తం రెండు ప్యాకేజీలుగా ఈ పనులను విభజించి టెండర్లు పిలవడానికి ప్రభుత్వం పరిపాలన అనుమతులు ఇచ్చింది. ఎస్‌ఎన్‌డీపీలో భాగంగా 2015లో ఇవే జంక్షన్ల అభివృద్ధి, ఫ్లై ఓవర్ల నిర్మాణానికి రూ.586 కోట్లతో పరిపాలన అనుమతులు ఇచ్చిన ఉత్తర్వులను రద్దు చేసింది. ఈ పనుల కోసం పిలిచిన టెండర్లను రద్దు చేసింది. అప్పుడు ఎం/ఎస్‌ ఎం. వెంకటరావు ఇన్‌ ఫ్రా ప్రాజెక్ట్స్‌ ప్రైవేట్‌ లిమిటెడ్‌ తో చేసుకున్న అగ్రిమెంట్‌ ను రద్దు చేస్తున్నట్టు ఉత్తర్వుల్లో పేర్కొన్నది. హైదరాబాద్‌ లో అత్యధిక ట్రాఫిక్‌ ఉండే కేబీఆర్‌ పార్క్‌ చుట్టూ ఈ జంక్షన్ల అభివృద్ధి, ఫ్లై ఓవర్లు, అండర్‌ పాస్‌ ల నిర్మాణంతో నగరం రూపురేఖలు మారుతాయని ప్రభుత్వవర్గాలు చెప్తున్నాయి.
