పది నిమిషాల్లోనే పాన్‌ కార్డు
ఎలా పొందాలో తెలుసుకోవాలనుకుంటున్నారా?
పాన్‌ (పర్మినెంట్‌ అకౌంట్‌ నంబర్‌) అన్ని బ్యాంకింగ్‌ ఆపరేషన్స్‌ కు తప్పనిసరి. ఇన్‌కం ట్యాక్స్‌ డిపార్ట్‌మెంట్‌ జారీ చేసే పాన్‌ కార్డు కోసం అప్లికేషన్‌ పెట్టుకొని రోజుల తరబడి ఎదురు చూడాల్సి ఉంటుంది. ఈ నిరీక్షణకు చెక్‌ పెట్టడానికి కొత్త విధానం తీసుకువచ్చింది కేంద్ర ప్రభుత్వం. ఈ - పాన్‌ ద్వారా ఆన్‌ లైన్‌ లో అప్లికేషన్‌ పెట్టుకున్న కొన్ని నిమిషాల్లోనే పాన్‌ నంబర్‌ కేటాయిస్తారు. పాన్‌ కార్డును ఈ - మెయిల్ ఐడీకి మెయిల్ చేస్తారు. అందరికీ ఉపయోగపడే ఇన్‌స్టంట్‌ పాన్‌ కార్డు ఎలా పొందాలి.. అందుకు ఏం చేయాలో ఓ లుక్కేయండి.. ఈ - పాన్‌ జారీ పూర్తిగా ఉచితమని ఇన్‌కం ట్యాక్స్‌ డిపార్ట్‌మెంట్‌ వెల్లడించింది. ఈ - పాన్‌ కార్డు కోసం ఈ - ఫైలింగ్‌ పోర్టల్‌ ను సందర్శించి దాని హోమ్‌ పేజీలో ఇన్‌స్టంట్‌ ఈ పాన్‌ ఆప్షన్‌ ఎంపిక చేసుకోవాలి. అక్కడ న్యూ ఈ - పాన్‌ ఆప్షన్‌ ఎంచుకోవాలి. ఆధార్‌ నంబర్‌ నమోదు చేసి కంటిన్యూ ఆప్షన్‌ క్లిక్‌ చేయాలి. అన్ని కండీషన్స్‌ చదివాను.. తదుపరి కొనసాగించడానికి అంగీకరిస్తున్నాను అనే ఆప్షన్‌ పై క్లిక్‌ చేయాలి.. ఆ తర్వాత ఆధార్‌ లింక్‌ చేసిన మొబైల్‌ నంబర్‌ కు ఓటీపీ వస్తుంది.. ఆరు అంకెల ఓటీపీని ఎంటర్‌ చేయాలి. యూఐడీఏఐ ఆధార్‌ వివరాలు ధ్రువీకరించడానికి కంటిన్యూ బటన్‌ క్లిక్‌ చేయాలి.. ఆ తర్వాత ఆప్లికేషన్‌ సబ్మిట్‌ చేసి.. వచ్చే అప్లికేషన్‌ నంబర్‌ రాసుకోవాలి. ఆ తర్వాత మొబైల్‌ నంబర్‌ కు కన్ఫర్మేషన్‌ మెసేజ్‌ వస్తుంది. మెసేజ్‌ వచ్చిన పది నిమిషాల్లోనే రిజిస్టర్డ్‌ ఈ మెయిల్ ఐడీకి ఈ పాన్‌ కార్డు వస్తుంది. అప్లికేషన్‌ నంబర్‌ ఎంటర్‌ చేయడం ద్వారా కూడా ఈ - పాన్‌ డౌన్‌ లోడ్‌ చేసుకోవచ్చు.
