మరో మాజీ మంత్రిపై పోలీసులకు ఫిర్యాదు

కూటమి ప్రభుత్వం అధికారంలోకి వచ్చాక మాజీ మంత్రులు, మాజీ ఎమ్మెల్యేలపై వరుసగా పోలీసులకు ఫిర్యాదులందుతున్నాయి. ఇప్పటికే ఇద్దరు మాజీ ఎమ్మెల్యేలు వేర్వేరు కారణాలతో జైలులో ఉన్నారు. మరికొందరిపై పోలీసులు కేసులు నమోదు చేశారు. ఏకంగా మాజీ సీఎం జగన్ పేరు కూడా ఎఫ్ఐఆర్ లో నమోదు కావడం విశేషం. ఈ క్రమంలో మాజీ మంత్రి సీదిరి అప్పలరాజుపై తాజాగా పోలీసులకు ఫిర్యాదు అందింది.

గతంలో చంద్రబాబు మానసిక పరిస్థితిపై సీదిరి అప్పలరాజు సంచలన వ్యాఖ్యలు చేశారు. అసెంబ్లీలో ప్రసంగిస్తూ చంద్రబాబు మానసిక పరిస్థితి బాగోలేదని అన్నారాయన. ఒక వైద్యుడిగా ఆ విషయాన్ని తాను ధ్రువీకరిస్తానన్నారు. చంద్రబాబును ఆస్పత్రికి పంపి మానసిక పరిస్థితి బాగైన తర్వాత అసెంబ్లీలోకి అనుమతిస్తే బాగుంటుందని చెప్పారు. అప్పట్లో ఈ వ్యాఖ్యలు సంచలనంగా మారినా ప్రతిపక్ష టీడీపీ సైలెంట్ గానే ఉంది. ఇప్పుడు కూటమి అధికారంలోకి రావడంతో పాత విషయాలన్నీ బయటకు తీస్తున్నారు నేతలు. చంద్రబాబుపై సీదిరి అప్పలరాజు అనుచిత వ్యాఖ్యలు చేశారంటున్నారు టీడీపీ నేతలు. ఆయనపై కేసు నమోదు చేసి విచారణ చేపట్టాలని డిమాండ్‌ చేశారు.

ఈమేరకు పలాస ఎమ్మెల్యే గౌతు శిరీష పోలీసులకు ఫిర్యాదు చేశారు. శ్రీకాకుళం జిల్లా కాశీబుగ్గ పోలీసు స్టేషన్‌కు వెళ్లిన ఎమ్మెల్యే శిరీష, పలువురు టీడీపీ నేతలు.. మాజీ మంత్రి అప్పలరాజుపై కంప్లయింట్ ఇచ్చారు. ప్రజా సమస్యలు చర్చించే శాసనసభలో అప్పలరాజు నోరు పారేసుకున్నారని, చంద్రబాబుపై అనుచిత వ్యాఖ్యలు చేశారని అన్నారు ఎమ్మెల్యే శిరీష.