చంద్రబాబు సోదరుడు రామ్మూర్తినాయుడు కన్నుమూత

ఆంధ్రప్రదేశ్‌ మాజీ ముఖ్యమంత్రి చంద్రబాబు నాయుడు సోదరుడు, హీరో నారా రోహిత్‌ తండ్రి నారా రామ్మూర్తి నాయుడు తీవ్ర అనారోగ్యంతో తుదిశ్వాస విడిచారు. కొద్ది రోజులుగా అనారోగ్యంతో బాధ పడుతున్న రామ్మూర్తి నాయుడును కుటుంబ సభ్యులు గచ్చిబౌలిలోని ఏఐజీ హాస్పిటల్‌ లో చేర్పించారు. అక్కడ చికిత్స పొందుతూ శనివారం మధ్యాహ్నం కన్నుమూశారు. ఢిల్లీ పర్యటనలో ఉన్న చంద్రబాబు నాయుడు మహావికాస్‌ అఘాడీ అభ్యర్థుల తరపున మహారాష్ట్ర అసెంబ్లీ ఎన్నికల ప్రచారానికి వెళ్లాల్సి ఉండగా, సోదరుడి అనారోగ్యం గురించి తెలుసుకొని హుటాహుటిన హైదరాబాద్‌ కు తిరిగి వచ్చేశారు. నారా లోకేశ్‌ అసెంబ్లీ సమావేశాలు సహా ఇతర కార్యక్రమాలు రద్దు చేసుకొని శనివారం ఉదయమే హైదరాబాద్‌ కు వచ్చారు. వారిద్దరితో పాటు నారా, నందమూరి కుటుంబ సభ్యులంతా హాస్పిటల్‌ కు వచ్చారు. రామ్మూర్తి నాయుడు అంత్యక్రియలు ఆదివారం వారి స్వగ్రామం నారావారిపల్లెలో నిర్వహించనున్నారు. రామ్మూర్తి నాయుడు మృతికి రాజకీయ, సినీరంగాలకు చెందిన ప్రముఖులు సంతాపం వ్యక్తం చేశారు. రామ్మూర్తి నాయుడు చంద్రగిరి అసెంబ్లీ స్థానం నుంచి 1994లో టీడీపీ అభ్యర్థిగా పోటీ చేసి విజయం సాధించారు. రామ్మూర్తి నాయుడుకు ఇద్దరు కుమారులు కాగా రోహిత్‌ సినీ హీరో, రోహిత్‌ కు ఇటీవలే వివాహ నిశ్చితార్థం జరిగింది. నెల రోజుల్లోగా వివాహం జరగాల్సి ఉండగా అంతలోనే రామ్మూర్తినాయుడు మృతిచెందారు.