అప్పుడే చేరదాం అన్నడు, కానీ.. నరేందర్ రెడ్డి సంచలనం

మాజీ మంత్రి పట్నం మహేందర్ రెడ్డి సీఎం రేవంత్ రెడ్డితో భేటీ కావడంపై స్పందించారు ఆయన సోదరుడు, మాజీ ఎమ్మెల్యే పట్నం నరేందర్ రెడ్డి. తన అన్న సీఎం రేవంత్‌తో సమావేశం అయ్యే విషయం తనకు తెలియదన్నారు. ఈ విషయం తనకు టీవీలో చూశాకే తెలిసిందన్నారు.

పట్నం మహేందర్‌ రెడ్డిపై సంచలన వ్యాఖ్యలు చేశారు నరేందర్ రెడ్డి. అసెంబ్లీ ఎన్నికలకు ముందే కాంగ్రెస్‌ పార్టీలో చేరదామని తన అన్న పట్నం మహేందర్ రెడ్డి చెప్పారని.. కానీ ఆ ప్రతిపాదనను తాను తిరస్కరించానని చెప్పారు. తన అన్న మహేందర్ రెడ్డి ఫ్యామిలీ కాంగ్రెస్‌లో చేరినప్పటికీ.. తాను బీఆర్ఎస్‌లోనే కొనసాగుతానని చెప్పారు. చేవేళ్ల లోక్‌సభ సీటుపై హామీ లభించినందుకే వారు కాంగ్రెస్‌లో చేరుతున్నారని చెప్పారు నరేందర్ రెడ్డి. రాజకీయాల్లో ఎవరి ఇష్టాలు వారివని స్పష్టం చేశారు నరేందర్ రెడ్డి.

2014లో తెలంగాణ రాష్ట్ర సమితితో రాజకీయ జీవితాన్ని ప్రారంభించిన నరేందర్ రెడ్డి.. మొదట్లో శాసనమండలి సభ్యుడిగా పనిచేశారు. ఇక 2018 ఎన్నికల్లో కొడంగల్‌ నుంచి పోటీ చేసిన నరేందర్ రెడ్డి రేవంత్ రెడ్డిని ఓడించి సంచలనం సృష్టించారు. ఇటీవల జరిగిన అసెంబ్లీ ఎన్నికల్లోనూ కొడంగల్‌ నుంచి పోటీ చేసి రేవంత్ రెడ్డి చేతిలో ఓడిపోయారు.