Adipurush - ఆదిపురుష్ ఫంక్షన్ కు బైక్ పై వస్తున్న మ్యూజిక్ డైరక్టర్

అజయ్-అతుల్ ద్వయం బాలీవుడ్ లో ఎంత పాపులర్ అనేది ప్రత్యేకంగా చెప్పనవసరం లేదు. వీరిద్దరిలో ఒకరైన మ్యూజిక్ డైరక్టర్ అతుల్ ఇప్పుడు ఒక ప్రత్యేకమైన పని చేయడానికి సిద్ధమయ్యాడు. ఈ సంగీత దర్శకుడు బైక్‌పై ముంబై నుంచి తిరుపతికి రాబోతున్నాడు. అవును, మీరు విన్నది కరెక్టే. ఈ మ్యూజిక్ డైరెక్టర్ ఏకంగా, ముంబై నుంచి బైక్ పై ప్రయాణించి తిరుపతి చేరబోతున్నాడు. దీనికి ఓ కారణం ఉంది.

ప్రభాస్, కృతి సనన్ జంటగా నటించిన ఆదిపురుష్ ప్రీ రిలీజ్ ఈవెంట్‌ తిరుపతిలో ఘనంగా జరగనున్న విషయం తెలిసిందే. ఈ సినిమాకు వర్క్ చేశాడు అతుల్. అందుకే ప్రీ రిలీజ్ ఈవెంట్ కి హాజరయ్యేందుకు ఇలా వినూత్నమైన ఆలోచనతో ముందుకొచ్చాడు.

ఈరోజు ముంబైలో బయలుదేరాడు అతుల్. జూన్ 5న తిరుపతికి చేరుకుంటాడు. తిరుపతి చేరుకున్న తర్వాత, అతుల్ ఆయన సోదరుడు అజయ్ తో కలిసి వెంకటేశ్వర స్వామి పాదాల వద్ద జైశ్రీరామ్ పాటను సమర్పించనున్నారు. ఆ తర్వాత ఇద్దరూ కలిసి ప్రీ-రిలీజ్ ఫంక్షన్ కు హాజరవుతారు.

అతుల్ చేస్తున్న ఈ సాహసం, ఆదిపురుష్ ప్రమోషన్ కు మరింత ప్లస్ కాబోతోంది. మరోపక్క ప్రభాస్ ఫ్యాన్స్, తమ హీరోకు ఘనంగా స్వాగతం పలకడానికి చాలా ఉత్సాహంగా ఉన్నారు. ప్రీ రిలీజ్ ఈవెంట్ కోసం నగరంలో ఆయనకు స్వాగతం పలికేందుకు ఇప్పటికే అక్కడివారు భారీ ఏర్పాట్లు చేస్తున్నారు.