Bhagavanth Kesari | వీడియో రిలీజ్ చేసిన అనీల్ రావిపూడి
Bhagavanth Kesari - బాలకృష్ణ హీరోగా నటిస్తున్న సినిమా భగవంత్ కేసరి. ఈ సినిమా నుంచి కొత్త వీడియో వచ్చింది.
నందమూరి బాలకృష్ణ, అనిల్ రావిపూడి కాంబినేషన్‌లో రూపొందుతున్న యూనిక్ యాక్షన్ ఎంటర్‌టైనర్ 'భగవంత్ కేసరి'. దసరా కానుకగా విడుదలకు సిద్ధమవుతోంది ఈ మూవీ. ఇదిలాఉండగా సినిమా షూటింగ్ పూర్తయింది. భగవంత కేసరి ప్రయాణం పేరిట వీడియో రిలీజ్ చేశారు.
పూజా కార్యక్రమం నుండి, నిర్మాణ పనులకు సంబంధించిన కీలకమైన వివరాలను వీడియోలో చూపించారు. ఈ సినిమా కోసం టీమ్ 8 నెలల పాటు శ్రమించింది. 24 అద్భుతమైన ప్రదేశాలలో, 12 భారీ సెట్లలో షూటింగ్ జరిగింది. బాలకృష్ణ కొన్ని పవర్ ప్యాక్డ్ డైలాగ్‌లు చెబుతున్నట్లు కూడా వీడియోలో ఉంది. “కలిసి మాట్లాడతా అన్నా కదా, అంతలోనే మందిని పంపాలా... గ్రౌండ్ ఫ్లోర్ బలిసిందా బే...” అంటూ గూండాలను హెచ్చరించడం నుంచి “బ్రో... ఐ డోంట్ కేర్” అనే డైలాగ్ వరకు బాలయ్య అదరగొట్టారు.
అనిల్ రావిపూడి, బాలకృష్ణను మునుపెన్నడూ లేని క్యారెక్టర్‌లో ప్రెజెంట్ చేస్తున్నాడు. గెటప్ కూడా పూర్తిగా కొత్తగా వుంది. సాల్ట్ అండ్ పెప్పర్ లుక్ లో బాలకృష్ణ కనిపిస్తారు. తమన్ అద్భుతమైన స్కోర్ విజువల్స్ కు బలం చేకూర్చింది.
ఇటీవలే గణేష్ చతుర్థి వేడుకల్లో సంచలనంగా మారిన గణేష్ సాంగ్ తో ఈ సినిమా మ్యూజికల్ ప్రమోషన్ కార్యక్రమాలు ప్రారంభమయ్యాయి. ఆ పాటలో బాలకృష్ణ, శ్రీలీల కలిసి డ్యాన్స్ చేయడం కన్నుల పండువగా ఉంది. ఇప్పుడు గణేశ్ నిమజ్జనం సందర్భంగా ఈ స్పెషల్ వీడియో రిలీజ్ చేశారు.
సాహు గారపాటి, హరీష్ పెద్ది నిర్మిస్తున్న ఈ సినిమాలో బాలకృష్ణ సరసన కాజల్ అగర్వాల్ హీరోయిన్ గా నటించగా, కూతురు వరుస పాత్రలో శ్రీలీల నటించింది. దసరా కానుకగా వచ్చేనెల 19న థియేటర్లలో అడుగుపెడుతున్నాడు భగవంత్ కేసరి.