లోకేష్ పాదయాత్రకు సాక్షి ఫుల్ కవరేజ్..

టీడీపీ అనుకూల మీడియా పూర్తిగా వైఎస్ వివేకా హత్యకేసు చుట్టూ కథనాలిస్తూ బిజీగా ఉంది. మధ్యలో నారా లోకేష్ పాదయాత్రపై ఫోకస్ తగ్గిపోయింది. అయితే ఆ బాధ్యతను భుజానికెత్తుకుంది సాక్షి. ఇటీవల నారా లోకేష్ పాదయాత్రను పద్ధతిగా ఫాలో అవుతోంది. వ్యతిరేక వార్తలే ఇస్తున్నా కూడా లోకేష్ యువగాళాన్ని నిత్యం హాట్ టాపిక్ గా ఉంచుతోంది సాక్షి.

ఆ మధ్య నారా లోకేష్ దళితులపై అనుచిత వ్యాఖ్యలు చేశారంటూ ఓ వీడియోని సాక్షి బాగా హైలెట్ చేసింది. ఏం చేశారు, ఏం పీకారంటూ.. లోకేష్ చేసిన వ్యాఖ్యలు సీఎం జగన్ ని ఉద్దేశించినవంటూ టీడీపీ అసలు వీడియో బయటపెట్టిన తర్వాత ఈ వ్యవహారం మరింత హాట్ టాపిక్ గా మారింది. లోకేష్ కి సపోర్ట్ గా, వ్యతిరేకంగా సోషల్ మీడియాలో పెద్ద వార్ నడిచిందనే చెప్పాలి. ఆ తర్వాత లోకేష్ ఎక్కడికెళ్లినా, ఏం మాట్లాడినా.. అందులో లోపాలను వెదికి మరీ సాక్షి హైలెట్ చేస్తోంది. ఒకరకంగా లోకేష్ యాత్రకు అవసరానికి మించి సాక్షి పబ్లిసిటీ ఇస్తోందనే చెప్పాలి.

అనుకూల వార్తలా, వ్యతిరేక వార్తలా అనే విషయం పక్కనపెడితే.. లోకేష్ కి సంబంధించి సాక్షిలోనే ఎక్కువ వార్తలు వస్తున్నాయనేది మాత్రం వాస్తవం. జగన్ పాదయాత్రతో లోకేష్ యాత్రను కంపేర్ చేస్తూ విమర్శలు ఎక్కుపెడుతున్నారు. ఈ క్రమంలో లోకేష్ ఫొటోలు సాక్షిలోనే ఎక్కువగా కనపడుతున్నాయి. జనాల స్పందన ఎలా ఉందనే విషయం కంటే, సాక్షి స్పందన మాత్రం బాగుందని టీడీపీ వర్గాలే సరదాగా చెబుతున్నాయి. 

ఇక లోకేష్, చంద్రబాబు సెల్ఫీ ఛాలెంజ్ ని కూడా సాక్షి హైలెట్ చేసుకుంటోంది. ఆమధ్య సీఎం జగన్ కూడా ఈ సెల్ఫీ ఛాలెంజ్ పై స్పందించారంటే ఆయన కూడా అధిక ప్రాధాన్యం ఇచ్చారనే లెక్క. మొత్తమ్మీద యాత్ర కవరే జ్ విషయంలో టీడీపీ అనుకూల మీడియాతో సాక్షి పోటీపడటం ఇక్కడ విశేషం.