కన్యకా పరమేశ్వరి అమ్మవారికి పట్టువ‌స్త్రాలు సమర్పించిన సీఎం చంద్రబాబు
వాసవీ కన్యకా పరమేశ్వరి ఆత్మార్ప‌ణ దినం సంద‌ర్భంగా అమ్మవారికి రాష్ట్ర ప్ర‌భుత్వం త‌ర‌ఫున సీఎం చంద్రబాబు ప‌ట్టు వ‌స్త్రాలు స‌మ‌ర్పించారు.
ఏపీ సీఎం చంద్రబాబు పశ్చిమగోదావరి జిల్లా పెనుగొండలో పర్యటించారు. వాసవీ కన్యకా పరమేశ్వరి ఆత్మార్ప‌ణ దినం సంద‌ర్భంగా ఇక్కడి ఆలయంలో అమ్మవారికి రాష్ట్ర ప్ర‌భుత్వం త‌ర‌ఫున ప‌ట్టు వ‌స్త్రాలు స‌మ‌ర్పించారు. అనంతరం ప్రత్యేక పూజ‌లు నిర్వ‌హించారు.అంతకు ముందు స్ధానిక మార్కెట్ యార్డులో ఏర్పాటు చేసిన హెలిప్యాడ్ వద్ద ముఖ్యమంత్రికి మంత్రి నిమ్మ‌ల రామానాయుడు, ఎమ్మెల్యేలు, ముఖ్య నేత‌లు ఘ‌న స్వాగ‌తం ప‌లికారు. అనంతరం ప‌ట్ట‌ణంలోని వాసవీ కన్యకా పరమేశ్వరి ఆల‌యానికి చేరుకున్న సీఎంకు ఆల‌య ప్ర‌ధానార్చ‌కులు, అధికారులు, సిబ్బంది పూర్ణ‌కుంభంతో స్వాగ‌తం ప‌లికారు. అనంతరం చంద్రబాబు అమ్మవారికి ప‌ట్టు వ‌స్త్రాలు స‌మ‌ర్పించి ప్రత్యేక పూజ‌లు నిర్వ‌హించారు.
ఆర్య‌వైశ్యుల పుణ్య‌క్షేత్రంగా విరాజిల్లుతున్న పెనుగొండలో కన్యకా పరమేశ్వరి ఆత్మార్ప‌ణ దినాన్ని ప్ర‌భుత్వం అధికారికంగా నిర్వ‌హిస్తున్న విష‌యం తెలిసిందే. ఇక రేపు అన్నమయ్య జిల్లాలో సీఎం చంద్రబాబు పర్యటించనున్నారు. రాయచోటి నియోజకవర్గంలోని రేపు సంబేపల్లిలో జరిగే ఎన్టీఆర్ భరోసా పెన్షన్ల పంపిణీ కార్యక్రమంలో పాల్గొని పెన్షన్లను చంద్రబాబు పంపిణీ చేయనున్నారు. విజయవాడ నుంచి ప్రత్యేక విమానంలో కడపకు చేరుకోనున్నారు. కడప ఎయిర్ పోర్ట్ నుండి హెలికాప్టర్ లో సంబేపల్లి మండలం పిఎన్ కాలనీ వద్ద ఏర్పాటు చేసిన హెలిపాడ్ వద్దకు చేరుకోనున్న సీఎం చంద్రబాబు నాయుడు… హెలిపాడ్ నుండి కాన్వాయ్ ద్వారా సంబేపల్లి చేరుకొని ఎన్టీఆర్ విగ్రహావిష్కరణ చేయనున్నారు. అనంతరం లబ్ధిదారుల ఇంటికి వెళ్లి పెన్షన్లను ముఖ్యమంత్రి పంపిణీ చేయనున్నారు