విజయనగరంలో మట్కా మూవీ ట్రైలర్ విడుదల

దర్శకుడు కరుణ కుమార్, మెగా హీరో వరుణ్ తేజ్ కాంబినేషన్‌లో వస్తున్న మూవీ 'మట్కా'. ట్రైలర్ విడుదలను మూవీ టీమ్ వినూత్నంగా నిర్వహించింది. విజయనగర ఆదిత్య థియేటర్ లో అభిమానులు కోలాహలం మధ్య మెగాహీరో వరుణ్ తేజ్ మట్కా సినిమా ట్రైలర్ విడుదల చేశారు. నిజానికి మట్కా సినిమా ట్రైలర్ ను ఈ నెల 2న మెగాస్టార్ చిరంజీవి చేతుల మీదుగా విడుదల చేశారు. దానికి కొనసాగింపుగా మళ్లీ ఇవాళ విడుదల చేశారు. మట్కా మూవీ ట్రైలర్ విడుదలకు ముందు మెగా హీరో పైడితల్లి అమ్మవారిని దర్శించుకున్నారు. ఈ సందర్భంగా వరుణ్ తేజ్ మీడియాతో మాట్లాడారు. గద్దల కొండ గణేష్ చిత్రం తర్వాత మరోసారి మళ్ళీ మట్కా మాస్ సినిమాతో ప్రేక్షకుల ముందుకు రాబోతున్నానన్నారు.

ఈ నెల 14న మట్కా సినిమా విడుదల కాబోతుందని, మెగా అభిమానులు, ప్రేక్షకులంతా ఆశీర్వదించి మట్కా సినిమాను విజయవంతం చేయాలని కోరారు. మట్కా ట్రైలర్ ను ప్రేక్షకుల మధ్యలో విడుదల చేసి వారి స్పందనను కళ్ళారా చూసేందుకు ఇక్కడికి రావడం జరిగిందన్నారు. కాగా అంతకుముందు హీరో వరుణ్ తేజ్ థియేటర్ కు వస్తున్నారని తెలిసిన ఆయన అభిమానులు బ్యాండ్ మేళాలు, బాణసంచాతో సందడి చేశారు. వరుణ్ తేజ్ ను చూసేందుకు వేలాదిగా తరలివచ్చిన అభిమానుల తోపులాటలో థియేటర్ గ్లాస్ డోర్లు పగిలిపోగా, ఈ ఘటనలో ఓ అభిమానికి గాయాలయ్యాయి. వాసు అనే అబ్బాయి కథే మట్కా. తను బర్మా నుంచి శరణార్థి గా వైజాగ్ వస్తాడు. 1958 నుంచి 82 వరకు తను అంచెలంచెలుగా ఎలా ఎదిగాడు అనేది చూపిస్తాం. వాసు అనే అబ్బాయి లైఫ్ స్టోరీ ఇది.