సంక్రాంతి బరి నుంచి తప్పుకున్న నాగ్ సినిమా...

ఈ ఏడాది సంక్రాంతికి సోగ్గాడే చిన్ని నాయనా సినిమాతో అలరించాడు నాగార్జున. రేసులో ఎన్టీఆర్, బాలయ్య లాంటి హీరోలు ఉన్నప్పటికీ ఏమాత్రం తగ్గకుండా తన సినిమాను విడుదల చేసి సూపర్ హిట్ అందుకున్నాడు. ఇప్పుడు అదే ఫార్ములాలో వచ్చే సంక్రాంతికి కూడా ఓం నమో వేంకటేశాయ చిత్రాన్ని విడుదల చేస్తామని గతంలోనే ప్రకటించాడు. కానీ తాజా సమాచారం ప్రకారం… ఈసారి సంక్రాంతికి నాగ్ సినిమా వచ్చేది డౌట్ గానే ఉంది. ఆ అనుమానాన్ని స్వయంగా నాగార్జునే వ్యక్తంచేశాడు. రాఘవేంద్రరావు దర్శకత్వంలో తెరకెక్కుతున్న ఓం నమో వెంకటేశాయలో చాలావారకు విజువల్ ఎఫెక్ట్స్‌తో కూడిన సన్నివేశాలు ఉంటాయని, వాటికి సరైన ఔట్‌పుట్ రావడానికి సమయం పడుతుందంటున్నాడు నాగ్. కాబట్టి సంక్రాంతికి సినిమా వస్తుందో లేదో అప్పుడే చెప్పలేనని స్పష్టంచేశాడు. బాహుబలి లాంటి విజువల్ వండర్ చూసిన ప్రేక్షకులకు తక్కువ స్థాయి గ్రాఫిక్స్ చూపిస్తే తేలిపోతామని, అందుకనే ఓం నమో వెంకటేశాయలో… గ్రాఫిక్స్ పై టెక్నికల్ టీమ్ బాగా కష్టపడుతుందని అన్నారు. మహేష్ రెడ్డి నిర్మాణంలో తెరకెక్కుతోన్న ఈ సినిమాలో అనుష్క, ప్రగ్యా జైస్వాల్, విమలారామన్ హీరోయిన్లుగా నటిస్తున్నారు. ఇప్పటికే అనుష్కకు సంబంధించిన చిత్రీకరణ పూర్తయింది.