ఆ విషయంలో ఒబామాను బాబు బీట్ చేశారట!

ఆంధ్రప్రదేశ్‌లో చంద్రబాబు పాలనపై లోక్‌సత్తా వ్యవస్థాపన అధ్యక్షుడు జయప్రకాశ్ నారాయణ స్పందించారు. రాజధాని శంకుస్థాపనకు ప్రభుత్వం చేస్తున్న ఏర్పాట్లపైనా రియాక్ట్ అయ్యారు. రాజధాని శంకుస్థాపనకు కోట్లు ఖర్చు చేస్తూ ఈ స్థాయిలో రాద్దాంతం చేయడం ఏమిటని ప్రశ్నించారు. చంద్రబాబుకు అమరావతి తప్ప మరేమి కనిపించడం లేదని మండిపడ్డారు. అమరావతిలో వారు మాత్రం అమరులు… మిగిలిన ప్రాంతాల్లోని వారు అసురులుగా చంద్రబాబుకు కనిపిస్తున్నారా అని ప్రశ్నించారు.

గతంలో హైదరాబాద్‌లోనే అన్ని పెట్టి పొరపాటు చేశారని… ఇప్పుడు చంద్రబాబు కూడా ఏపీలో అదే తప్పు చేస్తున్నారని హెచ్చరించారు. ఢిల్లీ వెళ్లిన ప్రతిసారి ప్రత్యేక హోదా గురించి అడక్కుండా… రాయితీల గురించి చంద్రబాబు మాట్లాడుతున్నారని జేపీ విమర్శించారు. చంద్రబాబు ముఖ్యమంత్రి అయ్యాక విమానాల కోసం చేసిన ఖర్చును అమెరికా అధ్యక్షుడు ఒబామా కూడా చేసి ఉండరని మండిపడ్డారు. హుద్‌హుద్ నుంచి ప్రజలు కోలుకుంటుంటే అక్కడ సంబరాలు చేయడం ఏమిటని జేపీ ప్రశ్నించారు. హుద్‌హుద్‌కు సంవత్సరికం ఏమిటని ప్రశ్నించారు. ఊరురా మట్టి సేకరించడం ఏమిటని ప్రశ్నించారు. ఏపీలో ఆరోగ్యం అధ్వాన్నం, అవినీతి అద్భుతం అన్నట్టుగా పాలన సాగుతోందని జేపీ మండిపడ్డారు.