బీజేపీతో తెగదెంపులకు సన్నద్ధమవుతున్న శివసేన? 

ఒకవేళ శివసేన మద్దతు ఉపసంహరించుకుంటే తమకు ఎన్సీపీ అండగా ఉంటుందని బీజేపీ భావిస్తోంది. అయితే అనూహ్యంగా 41 మంది ఎమ్మెల్యేలున్న ఎన్సీపీ ఫడ్నవీస్ సర్కారు ఆశలపై నీళ్లు చల్లింది. 288 సభ్యులున్న మహారాష్ట్ర అసెంబ్లీలో మెజారిటీకి 145 మంది ఎమ్మెల్యేలు అవసరం. 63 మంది ఎమ్మెల్యేలున్న శివసేనను ఫడ్నవీస్ సర్కారు వదిలించుకుంటే బిజెపి వద్ద తమ సొంత పార్టీ ఎమ్మెల్యేలు 123 మంది మాత్రమే మిగులుతారు. ఏడుగురు స్వతంత్ర ఎమ్మెల్యేలు కూడా మద్దతిస్తున్నా ప్రభుత్వం నిలబడాలంటే మరో 15 మంది ఎమ్మెల్యేలు అవసరం. శివసేనను వదిలించుకున్నాక అదే పార్టీ నుంచి కనీసం 18 మంది ఎమ్మెల్యేలు ప్రభుత్వానికి మద్దతుగా నిలిచేందుకు సిద్ధంగా ఉన్నారని బిజెపి నేతలు చెబుతున్నారు. పరిస్థితి ఇలా ఉండగానే ఎన్సీపీ అధినేత శరద్ పవార్ కుండ బద్దలు కొట్టారు. ఫడ్నవీస్ సర్కారుకు మద్దతు ఇచ్చే ప్రసక్తే లేదన్నారు. నిజంగా శివసేన మద్దతు ఉపసంహరించుకుంటే ఆ పార్టీ నుంచి 18 మంది బీజేపీ అండగా నిలబడతారా అన్నది మిలియన్‌ డాలర్ల ప్రశ్న.