విరాట పర్వానికి యు/ఏ సర్టిఫికెట్..!

దగ్గుబాటి రానా, సాయి పల్లవి హీరోహీరోయిన్లుగా తెరకెక్కుతున్న చిత్రం విరాట పర్వం. విప్లవ నేపధ్యంలో తెరకెక్కుతున్న ఈ ప్రేమకథా చిత్రానికి వేణు ఊడుగుల దర్శకత్వం వహిస్తున్నాడు. సురేష్ ప్రొడక్షన్స్ బ్యానర్ పై సురేష్ బాబు సమర్పణలో ఎస్ఎల్వీ సినిమాస్ పతాకంపై సుధాకర్ చెరుకూరి నిర్మిస్తున్నారు. కొన్ని నెలల కిందటే ఈ సినిమా షూటింగ్ పూర్తయినప్పటికీ కరోనా కారణంగా పలుమార్లు విడుదల వాయిదా పడుతూ వచ్చింది. ఎట్టకేలకు ఈ సినిమా ఈనెల 17వ తేదీన థియేటర్లలో విడుదల కానుంది.

ఇప్పటికే ఈ చిత్రం నుంచి విడుదలైన ట్రైలర్, టీజర్, పాటలు, ప్రేక్షకులను ఆకట్టుకున్నాయి. తాజాగా ఈ మూవీ సెన్సార్ తో పాటు అన్ని కార్యక్రమాలు పూర్తి చేసుకున్నట్లు తెలుస్తోంది. ఈ సినిమాకు యు/ఏ సర్టిఫికెట్ లభించింది. అలాగే రన్ టైం రెండు గంటల 31 నిమిషాలు ఉంది. ఈ సినిమాలో ఇతర ముఖ్య పాత్రల్లో ప్రియమణి, నివేదా పేతురాజ్, నందితా దాస్, నవీన్ చంద్ర, ఈశ్వరీ రావు తదితరులు నటిస్తున్నారు.

కాగా ఈ సినిమా విజయం రానాకు కీలకం కానుంది. 2017లో విడుదలైన నేనే రాజు నేనే మంత్రి సినిమా రానాకు చివరి హిట్ మూవీ. ఆ తరువాత మరో హిట్ మూవీ లేదు. ఇటీవల ఆయన నటించిన భీమ్లా నాయక్ హిట్ అయినప్పటికీ ఆ సినిమాలో పవన్ కళ్యాణ్ కూడా మరో కథానాయకుడు. రానా నటించిన గత చిత్రాలు ఎన్టీఆర్ కథానాయకుడు, ఎన్టీఆర్ మహానాయకుడు, అరణ్య, 1945 సినిమాలు బాక్సాఫీసు వద్ద పరాజయం పాలయ్యాయి. దీంతో విరాటపర్వం సినిమాపై రానా భారీగానే ఆశలు పెట్టుకున్నాడు.