కాంగ్రెస్ లోకి తుమ్మల.. మహూర్తం ఖరారు

తుమ్మల నాగేశ్వరరావు బీఆర్ఎస్ కి దూరమైన తర్వాత ఆయన గమ్యం కాంగ్రెస్సేనని దాదాపుగా ఖాయమైంది. అయితే మహూర్తం ఎప్పుడు..? కండువా ఎవరి చేతుల మీదుగా..? అనేది మాత్రం సస్పెన్స్ గా మారింది. ఇప్పుడు ఆ సస్పెన్స్ కి కూడా తెరపడింది. తుమ్మల నాగేశ్వరరావు ఈనెల 6న ఢిల్లీలో కాంగ్రెస్ పార్టీలో చేరబోతున్నట్టు తెలుస్తోంది. రాహుల్ గాంధీ చేతుల మీదుగా ఆయన కాంగ్రెస్ కండువా కప్పుకోబోతున్నారు.

హడావిడిగా మహూర్తం..

పాలేరు టికెట్ పై అలిగి బీఅర్ఎస్ కి దూరమైన తుమ్మల, కాంగ్రెస్ లో చేరే విషయంలో మాత్రం ఎందుకో ఆవేశపడలేదు. అందులోనూ పాలేరు టికెట్ విషయంలో షర్మిలనుంచి కూడా పోటీ ఉన్నట్టుగా తెలుస్తోంది. దీంతో ఆయన కాంగ్రెస్ నాయకుల్ని కలుస్తున్నా తన చేరికపై మాత్రం మాట దాటవేస్తూ వచ్చారు. రేవంత్ రెడ్డి, పొంగులేటి వరుసగా ఆయన్ను కలసినా కేవలం శాలువాలు కప్పారే కానీ, కాంగ్రెస్ కండువా కప్పేందుకు ఆయన ఒప్పుకున్నారని మాత్రం ప్రకటించలేకపోయారు. ఈరోజు ఆయన్ను మల్లు భట్టి విక్రమార్క కలిశారు. ఈ భేటీ తర్వాత చేరిక మహూర్తం ఖరారైనట్టు చెబుతున్నారు. ఈనెల 6న తుమ్మల కాంగ్రెస్ కండువా కప్పుకోబోతున్నారు.

రాహుల్ గాంధీ ఈనెల 7 నుంచి యూరప్ పర్యటనకు వెళ్తున్నారు. దీంతో ఆలోగా తుమ్మల చేరిక జరిగిపోవాలనేది వారి ఆలోచన. అందుకే తుమ్మల సహా ఆయన ముఖ్య అనుచరులు ఢిల్లీకి వెళ్లేందుకు ఏర్పాట్లు మొదలయ్యాయి. 6వతేదీ ఢిల్లీలో రాహుల్ గాంధీ సమక్షంలో ఆయన కాంగ్రెస్ తీర్థం పుచ్చుకోబోతున్నారు. తుమ్మల వర్గం నేతలు కూడా రాహుల్ భేటీకి హాజరవుతారని తెలుస్తోంది. ప్రజాభిప్రాయం మేరకు తన తదుపరి నిర్ణయం ఉంటుందని చెబుతూ వచ్చిన తుమ్మల, ఎట్టకేలకు ఈనెల 6న కాంగ్రెస్ గూటికి చేరబోతున్నారు.