ప్రపంచంలోనే అతిపెద్ద కంటి పరీక్ష కార్యక్రమం, కంటి వెలుగు 2.0, ఈ రోజే ప్రారంభం

ప్రపంచంలోనే అతిపెద్ద కంటి పరీక్ష కార్యక్రమంగా భావిస్తున్న, తెలంగాణ ప్రభుత్వం చేపట్టిన కంటి వెలుగు కార్యక్రమం రెండో దశ ఈ రోజు ఖమ్మం నుంచి ప్రారంభం కానుంది.

ఖమ్మం సమీకృత జిల్లా కార్యాలయాల సముదాయంలో ఇతర రాష్ట్రాలకు చెందిన ముగ్గురు ముఖ్యమంత్రుల సమక్షంలో ముఖ్యమంత్రి కేసీఆర్ ఈ కార్యక్రమాన్ని ప్రారంభిస్తారు.

అనంతరం కేసీఆర్, కేరళ సీఎం పినరయి విజయన్, పంజాబ్ సీఎం భగవంత్ సింగ్ మాన్, ఢిల్లీ సీఎం అరవింద్ కేజ్రీవాల్ సమక్షంలో కంటి వెలుగు శిబిరాల్లో ఆరుగురికి పరీక్షలు నిర్వహించి వారికి కళ్లద్దాలను అందజేస్తారు. ఈ సందర్భంగా కంటి వెలుగుపై కాఫీ టేబుల్‌ బుక్‌ను కూడా విడుదల చేయనున్నారు.

కంటి వెలుగులో మొదటి దశ ఎనిమిది నెలలపాటు 827 ఆరోగ్య బృందాలు నిర్వహించగా, రెండో దశలో 1,500 వైద్య బృందాలతో 100 రోజులు నిర్వహించనున్నారు. ప్రతి రోజూ ఉదయం 9 గంటల నుంచి సాయంత్రం 4 గంటల వరకు కంటి వెలుగు శిబిరాలు పనిచేస్తాయి. గురువారం నుంచి రాష్ట్రవ్యాప్తంగా అన్ని గ్రామాలు, గ్రామ పంచాయతీలు, మున్సిపల్ వార్డుల్లో సామూహిక కంటి పరీక్ష శిబిరాలు నిర్వహించనున్నారు.

ప్రతి శిబిరానికి ఒక వైద్యాధికారి నాయకత్వం వహిస్తుండగా, ఒక ఆప్టోమెట్రిస్ట్, ఇద్దరు ANMలు, ముగ్గురు ఆశా వర్కర్లు, ఒక‌ DEOతో సహా ఎనిమిది మంది ఇతర ఆరోగ్య కార్యకర్తలు కౌంటర్లను నిర్వహిస్తారు. పంపిణీ చేయనున్న 55 లక్షల ఉచిత కళ్లద్దాల్లో 30 లక్షలు రీడింగ్ గ్లాసులు, 25 లక్షల మందికి ప్రిస్క్రిప్షన్ గ్లాసులు ఉంటాయి.