బెటాలియన్‌ కానిస్టేబుళ్ల సెలవుల రద్దు నిర్ణయం తాత్కాలికంగా వాయిదా
కానిస్టేబుళ్ల కుటుంబసభ్యుల ఆందోళలన నేపథ్యంలో ఈ మేరకు నిర్ణయం తీసుకున్న పోలీసు శాఖ
బెటాలియన్‌ కానిస్టేబుళ్ల సెలవుల రద్దు నిర్ణయాన్ని పోలీసు శాఖ తాత్కాలికంగా వాయిదా వేసింది. కానిస్టేబుళ్ల కుటుంబసభ్యుల ఆందోళనల నేపథ్యంలో ఈ మేరకు నిర్ణయం తీసుకున్నది. ఒకే పోలీస్‌ విధానం ఉండాలని.. తమిళనాడు, కర్ణాటక రాష్ట్రాల్లో ఉన్న విధానాన్ని అమలుచేయాలని కానిస్టేబుళ్ల కుటుంబసభ్యులు వివిధ ప్రాంతాల్లో రెండురోజులుగా ఆందోళన చేస్తున్నారు. ఈ ఆందోళనలు ఇవాళ హైదరాబాద్‌కు పాకాయి. ఇందులో భాగంగానే బెటాలియన్‌ కానిస్టేబుళ్ల భార్యలు శుక్రవారం సెక్రటేరియట్‌ ముట్టడికి పిలుపునిచ్చారు. వారి ఆందోళనలతో ఉద్రిక్త వాతావరణ నెలకొన్నది. సెక్రటేరియట్‌ పరిసర ప్రాంతాలన్నీ ఆందోళనలు, నినాదాలతో అట్టుడికాయి. ఆందోళన చేస్తున్న వారిని అదుపులోకి తీసుకుని అక్కడి నుంచి తరలించారు.
ఈ సందర్భంగా వారు మాట్లాడుతూ.. తమ భర్తలతో పోలీస్‌ విధులు కాకుండా కూలీ పనులు చేయిస్తున్నారని ఆరోపించారు. పోలీసు విధులకు, వాళ్లు చేస్తున్న పనులకు సంబంధం లేదని వాపోయారు. పండుగలకు కూడా ఇంటికి రాకుండా చేస్తున్నారని ఆవేదన వ్యక్తం చేశారు. ఈ క్రమంలోనే సెలవులను రద్దు చేస్తూ గతంలో జారీచేసిన ఆదేశాలను పోలీసు శాఖ తాత్కాలికంగా నిలిపివేస్తూ ఉత్తర్వులు జారీచేసింది. తదుపరి ఆదేశాలు ఇచ్చే వరకు ఈ ఉత్తర్వులు అమల్లో ఉంటాయని పేర్కొన్నది. బెటాలియన్‌ కానిస్టేబుళ్ల కుటుంబ సభ్యుల ఆందోళలన నేపథ్యంలో ఈ అంశంపై కానిస్టేబుళ్ల కుటుంబసభ్యులతో చర్చించాలని నిర్ణయించింది.
