వికారాబాద్‌ కలెక్టర్‌ కారుపై రాళ్ల దాడి
ఫార్మా కంపెనీ ఏర్పాటు కోసం ప్రజాభిప్రాయ సేకరణకు వెళ్లిన జిల్లా కలెక్టర్‌, అధికారులకు బాధిత రైతుల నుంచి ప్రతిఘటన
ఫార్మా కంపెనీ ఏర్పాటు కోసం ప్రజాభిప్రాయ సేకరణకు వెళ్లిన జిల్లా కలెక్టర్‌, అధికారులకు బాధిత రైతుల నుంచి ప్రతిఘటన ఎదురైంది. కలెక్టర్‌, అధికారుల కార్లపై రాళ్లు, కర్రలతో దాడి చేశారు. వికారాబాద్‌ జిల్లా దుద్యాలలో ఈ ఘటన చోటుచేసుకున్నది.
వివరాల్లోకి వెళితే.. ఫార్మా సంస్థ ఏర్పాటునకు సంబంధించి భూసేకరణ కోసం దుద్యాల మండలం లగచర్ల గ్రామానికి చెందిన రైతులతో ప్రభుత్వం సంప్రదింపులు చేస్తున్నది. ఫార్మా కంపెనీ ఏర్పాటును రైతులు తీవ్రంగా వ్యతిరేకిస్తున్నారు. ఈ క్రమంలోనే దుద్యాల శివారులో ఇవాళ ప్రజాభిప్రాయ సేకరణ నిర్వహించడానికి ఏర్పాట్లు చేశారు. ఈ కార్యక్రమంలో పాల్గొనడానికి వికారాబాద్‌ జిల్లా కలెక్టర్‌ ప్రతీక్‌ జైన్‌, కొడంగల్‌ అర్బన్‌ డెవలప్‌మెంట్‌ అథారిటీ (కడా) ప్రత్యేకాధికారి వెంకట్‌రెడ్డి, అడిషనల్‌ కలెక్టర్‌ లింగానాయక్‌, సబ్‌ కలెక్టర్‌ ఉమాశంకర్‌ ప్రసాద్‌ వచ్చారు. దుద్యాల శివారులో ప్రజాభిప్రాయ సేకరణ ఏర్పాటు చేస్తే.. రైతుల మాత్రం అక్కడికి వెళ్లకుండా లగచర్లలోనే ఉండిపోయారు.
ఈ నేపథ్యంలో గ్రామానికి చెందిన సురేశ్‌ అనే వ్యక్తి బాధిత రైతుల తరఫున ప్రజాభిప్రాయ సేకరణ వేదిక వద్దకు వెళ్లి కలెక్టర్‌ ప్రతీక్‌ జైన్‌తో మాట్లాడారు. రైతులంతా తమ ఊరిలో ఉన్నారని.. అక్కడే ప్రజాభిప్రాయ సేకరణ నిర్వహించాలని కోరారు. దీంతో కలెక్టర్‌, ఇతర అధికారులు అంగీకరించి అక్కడికి బయలుదేరి వెళ్లారు. అధికారులు గ్రామానికి చేరుకోగానే రైతులు ఒక్కసారిగా వారి వాహనాలపై రాళ్లు, కట్టెలతో దాడికి పాల్పడ్డారు. ఈ ఘటనలో వాహనాల అద్దాలు ధ్వంసమయ్యాయి. కడా ప్రత్యేకాధికారి వెంకట్‌రెడ్డికి రాళ్లు తగలడంతో గాయాలయ్యాయి. ఆయన పొలాల వెంట పరుగెత్తి అక్కడి నుంచి వెళ్లిపోయారు. జిల్లా కలెక్టర్‌, అధికారులు లగచర్ల వెళ్లే సమయంలో ముందు జాగ్రత్తగా బందోబస్తు ఏర్పాటు చేయకపోవడంతో ఈ ఘటన జరిగినట్లు సమాచారం.
