రూ.350 కోట్లతో తెలంగాణలో సింటెక్స్ మాన్యుఫ్యాక్చరింగ్ యూనిట్

తెలంగాణలో మరో పెద్ద సంస్థ తయారీ యూనిట్‌ను నెలకొల్పడానికి ముందుకు వచ్చింది. వాటర్ ట్యాంకులు అనగానే అందరికీ గుర్తుకు వచ్చే 'సింటెక్స్' కంపెనీ తెలంగాణలో భారీ తయారీ యూనిట్ ఏర్పాటుకు రంగం సిద్ధం చేస్తోంది. రూ.350 కోట్లతో ఈ మాన్యుఫ్యాక్ఛరింగ్ యూనిట్‌ను నెలకొల్పుతున్నట్లు ఐటీ, పరిశ్రమలు, మున్సిపల్ శాఖ మంత్రి కేటీఆర్ తెలిపారు.

సింటెక్స్ బ్రాండ్ పేరుతో ఈ తయారీ యూనిట్‌లో వాటర్ ట్యాంకులు, పైపులు, ఆటో కాంపోనెంట్, ఆన్సిలరీస్ ఉత్పత్తి చేయనున్నారు. రూ.350 కోట్ల పెట్టబడితో నిర్మించనున్న ఈ తయారీ యూనిట్‌ ద్వారా 1000 మందికి ఉద్యోగాలు వస్తాయని మంత్రి కేటీఆర్ చెప్పారు. కాగా, ఈ తయారీ యూనిట్‌కు ఈ నెల 28న మంత్రి కేటీఆర్ భూమి పూజ చేయనున్నారు.

దేశంలో వాటర్ ట్యాంకులు, పైపుల తయారీలో సింటెక్స్ బ్రాండ్ అందరికీ సుపరిచితం. ఈ ఏడాదే సింటెక్స్ కంపెనీని వెల్‌స్పన్ సంస్థ కొనుగోలు చేసింది. వెల్‌స్పన్ సంస్థ ఇప్పటికే తెలంగాణలో రూ.2000 కోట్లకు పైగా పెట్టుబడులు పెట్టింది. తెలంగాణలో మొత్తం రూ.5,000 కోట్ల పెట్టుబడులు పెడతామని ఇప్పటికే వెల్‌స్పన్ హామీ ఇచ్చింది. రంగారెడ్డి జిల్లాలోని చందన్‌వల్లిలో ఈ ఏడాది ఫిబ్రవరిలో వెల్‌స్పన్ సంస్థ ఒక తయారీ యూనిట్ ప్రారంభించింది. అక్కడ ఫ్లోరింగ్ యూనిట్లను తయారు చేస్తోంది. తాజాగా సింటెక్స్ బ్రాండ్ ద్వారా రూ.350 కోట్ల పెట్టుబడితో తయారీ యూనిట్ నెలకొల్పనున్నది.