సత్యం స్కామ్‌లో అప్డేట్‌.. రూ.1,747 కోట్లు చెల్లించాలి

దేశవ్యాప్తంగా సంచలనం సృష్టించిన సత్యం కంప్యూటర్స్ సర్వీసెస్ కుంభకోణం కేసులో.. మార్కెట్స్ రెగ్యులేటర్‌ సెక్యూరిటీస్ అండ్‌ ఎక్ఛేంజ్ బోర్డు ఆఫ్‌ ఇండియా-సెబీ తాజాగా ఆదేశాలు జారీ చేసింది. చట్టవిరుద్ధంగా పొందిన లాభాలు రూ.624 కోట్లను 2009 జనవరి 7 నుంచి ఇప్పటిదాకా 12 శాతం వార్షిక వడ్డీతో ఈ మొత్తాన్ని చెల్లించాల‌ని 96 పేజీల ఆర్డర్‌లో పేర్కొంది. ఈ మొత్తాన్ని 45 రోజుల్లోగా క‌ట్టాల‌ని ఆరుగురిని ఆదేశించింది.

వీరిలో సత్యం మాజీ ఛైర్మన్‌ బి.సత్యం రామలింగరాజు, మాజీ ఎండీ బి.రామరాజు, బి.సూర్యనారాయణ రాజు(రామలింగరాజు సోదరుడు).. వీరితో పాటు SRSR హోల్డింగ్, వి.శ్రీనివాస్‌ మాజీ CFO, జి.రామకృష్ణ మాజీ వైస్‌ప్రెసిడెంట్‌- ఫైనాన్స్‌ ఉన్నారు. ఈ రూ.624 కోట్లు 12 శాతం వడ్డీతో కలుపుకుంటే ఇప్పుడు రూ.1,747 కోట్లకు చేరింది.

2018 అక్టోబర్‌, నవంబర్‌లో 12 శాతం వార్షిక వడ్డీతో రూ.840.15 కోట్లు చెల్లించాలని సెబీ ఇచ్చిన ఆదేశాలను స‌త్యం రామలింగ రాజుసహా ఆరుగురు సవాల్‌ చేశారు. దీంతో ఈ ఏడాది ఫిబ్రవరిలో శాట్‌.. మళ్లీ లెక్కించి తాజా ఆదేశాలివ్వాలంటూ సెబీకి సూచించింది. ఈ నేపథ్యంలోనే సెబీ కొత్త ఆర్డర్‌ ఇచ్చింది. ఈ మొత్తాన్ని 45 రోజుల్లోగా చెల్లించాలని ఆదేశాలు జారీ చేసింది. ఈ మొత్తంలో రూ.1,123 కోట్లు వడ్డీనే. 2009 జనవరి 7న ఈ స్కామ్‌ వెలుగులోకి వచ్చింది.