రాజ్యసభ ఎన్నికలకు షెడ్యూల్‌.. తెలంగాణ స్థానాలపై ఉత్కంఠ..!

రాజ్యసభ ఎన్నికలకు షెడ్యూల్ విడుదలైంది. దేశవ్యాప్తంగా 15 రాష్ట్రాల్లో 56 రాజ్యసభ స్థానాలకు త్వరలోనే ఎన్నికలు జరగనున్నాయి. ఫిబ్రవరి 8న ఎన్నికల నోటిఫికేషన్ వెలువడనుండగా.. ఫిబ్రవరి 27న పోలింగ్ జరగనుంది.

తెలంగాణలో 3, ఆంధ్రప్రదేశ్‌లో 3 స్థానాలకు ఎన్నికలు జరగనున్నాయి. తెలంగాణ నుంచి వద్దిరాజు రవిచంద్ర, బడుగుల లింగయ్య యాదవ్‌, జోగినపల్లి సంతోష్‌ కుమార్‌ల పదవీకాలం ముగియనుంది. ఇక ఏపీలో వేమిరెడ్డి ప్రభాకర్ రెడ్డి, సీఎం రమేష్‌, కనకమేడల రవీంద్ర స్థానాలు ఖాళీ కానున్నాయి. ఏపీలో దాదాపు 3 స్థానాలు వైసీపీకే దక్కే అవకాశాలుండగా.. తెలంగాణలో ఎవరికీ దక్కుతాయనే దానిపై ఉత్కంఠ నెలకొంది.

ఇందులో భాగంగానే తెలంగాణలో బీఆర్ఎస్ ఎమ్మెల్యేలకు గాలం వేసే ప్రయత్నాలు జరగుతున్నాయని ప్రచారం జరుగుతోంది. ఇటీవల సీఎం రేవంత్ రెడ్డితో బీఆర్ఎస్ ఎమ్మెల్యేల వరుస సమావేశాలు ఈ కోవలోకే వస్తాయని రాజకీయ విశ్లేషకులు అభిప్రాయపడుతున్నారు.

అత్యధికంగా ఉత్తరప్రదేశ్‌లో 10 రాజ్యసభ స్థానాలు ఖాళీ కానుండగా.. బిహార్‌, మహారాష్ట్రలో ఆరేసి స్థానాలకు ఎన్నికలు జరగనున్నాయి. బెంగాల్‌, మధ్యప్రదేశ్‌లో ఐదేసి స్థానాలు ఖాళీ కానున్నాయి.