ఆలయ హుండీలో రూ.100 కోట్ల చెక్కు.. అసలు విషయం తెలిసి అవాక్కయిన అధికారులు

దక్షిణ కాశీగా పేరొందిన అలంపుర్ జోగులాంబ, బాలబ్రహ్మేశ్వర స్వామి దేవాలయాలకు భక్తుల తాకిడి ఎక్కువగానే ఉంటుంది. అలంపూర్ సమీపంలోనే కృష్ణ, తుంగభద్ర నదుల సంగమం అవుతుండటంతో ఈ క్షేత్రానికి విశిష్టత నెలకొన్నది. కాగా, ప్రతీ నెల ఈ ఆలయానికి సంబంధించిన హుండీని లెక్కిస్తారు. దేవాదాయ శాఖ ఉన్నతాధికారులు, ఆలయ ఈవో పర్యవేక్షణలో సిబ్బంది ఈ లెక్కింపును చేపడతారు. శనివారం ఇలా హుండీలోని నాణేలు, నోట్లు, ఇతర కానుకలను వేరు చేస్తూ లెక్కిస్తున్నారు. ఈ క్రమంలో వారికి ఓ చెక్కు కనపడింది.

సదరు చెక్కు మీద అక్షరాలా రూ. 100 కోట్లు అని రాసి ఉన్నది. దీంతో హుండీ లెక్కిస్తున్న సిబ్బంది ఉలిక్కిపడ్డారు. జోగులాంబ దేవాలయానికి రూ. 100 కోట్లు వేసే భక్తులు కూడా వస్తారా అని సంభ్రమాశ్చర్యాలకు లోనయ్యారు. ఆ చెక్కుపై ఆర్మీ జవాన్ల కోసం అని రాసి ఉంది. భారీ విరాళం కావడంతో సిబ్బంది వెంటనే అధికారులను అప్రమత్తం చేశారు. అయితే ఆ చెక్కును చూసిన అధికారులకు డౌట్ వచ్చింది. వెంటనే సదరు చెక్ ఏ బ్యాంకుదో అని ఆరా తీశారు. అది వరంగల్‌లోని ఏపీజీవీబీ బ్యాంకుదిగా గుర్తించి ఆ బ్యాంకుకు ఫోన్ చేశారు. బ్యాంకు అధికారులు చెప్పిన వివరాలు విని అధికారులు అవాక్కయ్యారు.

హుండీలో వేసిన చెక్ వరంగల్ బ్రాంచిది అయినా.. సదరు వ్యక్తి మాత్రం ఆలంపూర్‌కు చెందిన వాడేనని తెలిసింది. అంతే కాకుండా ఆ వ్యక్తి ఖాతాలో కేవలం రూ. 23 వేలు మాత్రమే ఉన్నాయని అధికారులు స్పష్టం చేశారు. ఆ వ్యక్తి కోసం ఆరా తీయగా అతడికి మతిస్థిమితం లేదని.. అతడిని కోర్టు ఆదేశాల మేరకు ఇటీవలే పోలీసులు హైదరాబాద్‌లోని ఎర్రగడ్డ ఆసుపత్రిలో చేర్చినట్లు తెలిసింది. దీంతో ఆలయ అధికారులు చేసేదేమీ లేక ఆ చెక్కును పక్కన పెట్టి భద్రపరిచారు. అదీ రూ. 100 కోట్ల చెక్కు కథ.